'ஏ' பாட்டு எழுதிய வாலி

தமிழ் சினிமாவில் கவிஞர் வாலி எழுதும் பாடல்களில் இளமை துள்ளும். அத்தகைய பாடல்களில் நவரசங்களையும் காணலாம். ""அத்தைமடி மெத்தையடி... '' என்கிற தாலாட்டுப் பாடலானாலும், ""நான் மாந்தோப்பில் நின்றிருந்தேன்...'' என்று தொடங்கும் நாட்டுப்புற பாடலானாலும், ""வா! வாத்தியாரே வூட்டாண்ட...'' போன்ற சென்னைத் தமிழ்ப் பாடல்களானாலும் கவிஞர் வாலியால் மட்டுமே அனைத்து தரப்பு ரசிகர்களையும் கவர முடியும்.

அந்த வகையில் சமீபத்தில், "அகராதி' படத்திற்காக ஒரு வித்தியாசமான பாடலை எழுதியிருந்தார் வாலி. பாடலை பார்த்த சென்சார் அதிகாரிகள், இந்தப் பாட்டு படத்தில் இடம் பெற வேண்டுமானால் இதற்கு "ஏ' சான்றிதழ் வழங்க வேண்டியதாக இருக்கும் சம்மதமா? என்று, "அகராதி' படத்தின் இயக்குநர் நாகா வெங்கடேஷிடம் கேட்டபோது, ""எனக்கு வாலியின் பாடல் முக்கியம்.

அதனால் எந்த சான்றிதழ் கொடுத்தாலும் பரவாயில்லை. பாட்டை கட் செய்யாதீர்கள்...'' என்று கூறியிருக்கிறார்.

சுந்தர்.சி.பாபு இசையமைப்பில், வாலி எழுதிய அந்தப் பாடலின் முதல் வரி, ""முக்கோண சிம்மாசனம் உட்கார கூப்பிடுதே...'' எனத் தொடங்குகிறது. இந்தப் பாடலுக்கு தாராளமாக கவர்ச்சி காட்டி நடித்திருக்கிறார் அர்ச்சனா.

படத்திலோ அவருக்கு போலீஸ் அதிகாரி வேடம். இந்தப் படத்தில் கதையின் நாயகியாக மோனிகா நடிக்க, மற்றொரு நாயகியாக "களவானி' ஓவியா நடித்திருக்கிறார். மேலும் கீர்த்தி சாவ்லாவும் முக்கிய பாத்திரம் ஒன்றில் நடித்திருக்கிறார். கதையின் நாயகனாக பிரதீப், அண்ணனாக பவன், நகைச்சுவைக்கு சத்யன், வையாபுரி, டெல்லிகணேஷ், "வெண்ணிற ஆடை' மூர்த்தி, வில்லியாக புவனேஸ்வரி, வில்லன்களாக அலெக்ஸ், "காதல்' தண்டபாணி, வாசுவிக்ரம், கராத்தே மணியின் மகன் ஆர்.வி.டி.ராஜ்குமார் உள்ளிட்டோரும் நடித்துள்ளனர்.

இந்தப் படத்தை பற்றி இயக்குநர் நாகா வெங்கடேஷ் கூறும்போது, ""இது பிரபல எழுத்தாளர் ராஜேஷ்குமார் எழுதிய "இரவில் ஒரு வானவில்' நாவலின் கதைக் கருவை மையமாக வைத்து உருவாக்கியுள்ள படம். குடும்பப் பின்னணியில், உறவுகளின் சிக்கல்களையும், அதனால் ஏற்படும் விபரீதங்களையும் ஆக்ஷனோடு சொல்லும் க்ரைம் கதை.

பணம் என்கிற மாயப் பிசாசினால், கலாச்சாரங்களை மீறி, சிதறிப் போன உறவுகளை சொல்லும் கதை இது. அகராதி என்பதற்கு பல அர்த்தங்கள் இருக்கின்றன. சமுதாயத்தை மதிக்காமல் தன் போக்கில் திரிபவனும் அகராதியே. வரம்பு மீறி வார்த்தைகளை பேசுபவனும் அகராதியே. யாருக்கும் கட்டுப்படாத காற்றாய் திரிபவனும் அகராதியே. எதற்கும் அஞ்சாமல் எதிர்த்து வாழ்பவனும் அகராதியே. மொழி பெயர்ப்பும் அகராதியே. விளங்காத விஷயங்களுக்கு விளக்கம் கூறுவதும் அகராதியே. மொத்தத்தில் தலைக்கனமும் அகராதிதான்.

இலக்கணமும் அகராதிதான். அப்படி ஒரு கோணத்தில் காதல், குடும்பம், ஆக்ஷன், சஸ்பென்ஸ் உடன் உருவாகும் படமாக "அகராதி' இருக்கும். விரைவில் படத்தை திரைக்கு கொண்டு வருகிறோம்.

இந்தப் படத்தில் சுந்தர்.சி. பாபு இசையில் ஐந்து பாடல்கள் இடம் பெற்றிருக்கு. பாடல்களை கவிஞர் வாலி, தாமரை, அண்ணாமலை ஆகியோர் எழுதி உள்ளனர். சிவகுமார் ஒளிப்பதிவையும், தியாகராஜன் சண்டை பயிற்சியையும் மேற்கொள்கிறார்கள். இந்தப் படத்தை வர்னிகா மூவி மேக்கர்ஸ் சார்பில் டி.வரத் தயாரித்துள்ளார்'' என்றார்.