100வது சதம் அடித்ததும் ரிடையர் ஆக சச்சின் முடிவு?

தனது நூறாவது சதத்தை அடித்ததும் ஒரு நாள் கிரிக்கெட் போட்டிகளிலிருந்து ஓய்வு பெற சச்சின் டெண்டுல்கர் திட்டமிட்டுள்ளதாக தெரிகிறது. அதேபோல விரைவில் வி.வி.எஸ்.லட்சுமனும் தனது ஓய்வை அறிவிக்கவுள்ளதாக தகவல்கள் வெளியாகியுள்ளன.

இருப்பினும் தன்னைப் பற்றிய இந்த செய்தியை சச்சின் உடனடியாக மறுத்துள்ளார்.

இதுதொடர்பாக ஒரு செய்திச் சேனலுக்கு அவர் அவசர எஸ்.எம்.எஸ். ஒன்றை அனுப்பியுள்ளார். அதில், எனது ஓய்வு குறித்த செய்திகளில் உண்மை இல்லை. குறிப்பாக, நான் நூறாவது சதத்தை அடித்த பிறகுதான் ஓய்வு பெறுவேன் என்பதில் உண்மையில்லை என்று கூறியுள்ளார் சச்சின்.

எத்தனையோ சாதனைகளைப் படைத்து அத்தனை கிரிக்கெட் வீரர்கள் மத்தியிலும் மிகப் பெரிய இமயமாக உயர்ந்து நிற்பவர் சச்சின். இவரால் இந்திய அணி பலமுறை உயர்வு கண்டிருந்தாலும் கூட சாதனைகளை மனதில் வைத்துக் கொண்டு விளையாடுபவர் சச்சின் என்ற குற்றச்சாட்டும் கூடவே உள்ளது.

இந்த நிலையில் கடந்த ஒரு வருடத்திற்கும் மேலாக ஒரு சதம் அடிக்க முடியாமல் திணறிக் கொண்டிருக்கிறார் சச்சின். இது பெரும் சர்ச்சையை ஏற்படுத்தியுள்ளது. மற்ற வீரர்கள் என்றால் பரவாயில்லை, சச்சினே சதம் போட திணறலாமா என்ற ஆதங்கம்தான் அது.

இங்கிலாந்திலும் தொடர்ந்து ஆஸ்திரேலியாலும் பெரிய அளவில் சோபிக்கவில்லை சச்சின். குறிப்பாக ஆஸ்திரேலிய தொடரில் ஒரு பாதிப்பையும் ஏற்படுத்தவில்லை சச்சின். சச்சினைப் பார்த்து பயந்த ஆஸ்திரேலியர்கள், அடப் பாவமே என்று அனுதாப்படும் அளவுக்கு இந்த முறை நிலை இருந்தது.

இதனால் சச்சின் ஓய்வு பெற வேண்டும் என்ற கோரிக்கைகள் வலுத்து வருகின்றன. அவர் உடனடியாக விலக வேண்டும் என்றும் இதுவரை இல்லாத அளவுக்கு கோரிக்கை இருக்கிறது. குறிப்பாக கவாஸ்கரே சச்சின் ஓய்வு பெறலாம் என்று கூறி விட்டார்.

ஆனால் யாரும் எதிர்பாராத வகையில் ராகுல் டிராவிட் தனது ஓய்வை சந்தோஷமாக அறிவித்து விட்டார். இது சச்சினுக்கு மேலும் நெருக்கடியை அதிகரித்துள்ளது.

இந்த நிலையில், தனது நூறாவது சதத்தை எடுத்தவுடன் சச்சின் ஓய்வு பெறலாம் என்று செய்திகள் வெளியாகின. அதைத்தான் தற்போது சச்சின் மறுத்துள்ளார்.

இதுகுறித்து இந்திய கிரிக்கெட் வாரியத் தகவல்களை மேற்கோள்காட்டி வெளியாகியுள்ள செய்தியில்,

தனது 100வது சர்வதேச சதத்திற்காக சச்சின் காத்திருக்கிறார். அதை முடித்தவுடன் ஒரு நாள் போட்டிகளிலிருந்து அவர் ஓய்வு பெறுவார். இருப்பினும் டெஸ்ட் போட்டிகளில் தொடர்ந்து ஆடுவார். அதேபோல விவிஎஸ் லட்சுமனும் தனது ஓய்வு முடிவை விரைவில் அறிவிக்கவுள்ளார் என்று அந்த செய்தி கூறுகிறது.

இந்திய கிரிக்கெட் அணியில் தற்போது மிச்சமுள்ள ஜாம்பவான் வீரர்கள் சச்சின், டிராவிட் மற்றும் லட்சுமன் மட்டுமே. அதில் டிராவிட் விலகி விட்டார். எஞ்சியுள்ளது சச்சினும், லட்சுமனும்தான் என்பதால் அவர்கள் மீதான எதிர்பார்ப்புகளும், நெருக்கடிகளும் தாறுமாறாக உயர்ந்து கொண்டிருக்கிறது.

இன்று தொடங்கியுள்ள ஆசியக் கோப்பைப் போட்டியில் சச்சின் தனது 100வது சதத்தை எட்டுவார் என்று தெரிகிறது. காரணம், இப்போட்டி தெற்காசியாவில், அதாவது வங்கதேசத்தில் நடைபெறுகிறது. இந்தியர்களுக்குச் சாதகமான மைதானம் என்பதால் இங்காவது தனது சாதனையை சச்சின் நிகழ்த்துவார் என்று பெரிதாக எதிர்பார்க்கப்படுகிறது. எனவே ஆசியக் கோப்பைப் போட்டியுடன் சச்சின் விடைபெறுவார் எனத் தெரிகிறது.

எனவே அடுத்த பத்து நாட்களில் சச்சினின் ஓய்வு குறித்து ஒரு தெளிவான நிலை தெரிய வரும் என்று எதிர்பார்க்கலாம்.