ஐ.நா. சபையில் இலங்கைக்கு எதிராக அமெரிக்கா தீர்மானம் தாக்கல் செய்ப்படது

இலங்கையில் கடந்த 2009&ம் ஆண்டு விடுதலைப்புலிகளுக்கு எதிராக நடைபெற்ற இறுதிக்கட்ட போரின் போது, ராணுவம் கண்மூடித்தனமாக தாக்குதல் நடத்தியது. அப்பாவி தமிழர்கள் படுகொலை செய்யப்பட்டனர்.

மனித உரிமைகளை மீறும் வகையில் ராணுவம் போர்க்குற்ற நடவடிக்கைகளில் ஈடுபட்டது பற்றி விசாரித்து இலங்கை மீது உரிய நடவடிக்கை எடுக்க வேண்டும் என்று பல்வேறு நாடுகள் வற்புறுத்தி வருகின்றன.

சுவிட்சர்லாந்து நாட்டின் ஜெனீவா நகரில் உள்ள ஐக்கிய நாடுகள் சபையின் மனித உரிமைகள் குழுவில் இந்த பிரச்சினை கிளப்பப்பட்டு உள்ளது. இலங்கையில் நடந்த மனித உரிமை மீறல் தொடர்பாக, ஐ.நா.மனித உரிமைகள் குழுவில் தீர்மானம் கொண்டுவர அமெரிக்கா முடிவு செய்தது. ஆனால் இதற்கு இலங்கை எதிர்ப்பு தெரிவித்தது. என்றாலும், இலங்கை அரசுக்கு எதிரான மனித உரிமை மீறல் தீர்மானத்தை ஐ.நா. மனித உரிமைகள் குழுவில் அமெரிக்கா அதிகாரபூர்வமாக தாக்கல் செய்தது.

இந்த தீர்மானத்தின் நகல் ஐ.நா. மனித உரிமைகள் குழுவில் உறுப்பினர்களாக அங்கம் வகிக்கும் 47 நாடுகளுக்கு வழங்கப்பட்டு உள்ளது. அந்த நாடுகளின் கருத்துக்களுடன் இந்த தீர்மானத்தின் மனித உரிமைகள் குழு கூட்டத்தில் விவாதமும் பின்னர் வாக்கெடுப்பும் நடைபெறும்.

அமெரிக்கா தாக்கல் செய்துள்ள தீர்மானத்தில் கூறப்பட்டு இருப்பதாவது:

தீவிரவாதத்துக்கு எதிராக எடுக்கப்படும் நடவடிக்கைகள் சர்வதேச மனித உரிமைகள், பாதுகாப்பு, மனிதாபிமான விதிகளுக்கு உட்பட்டதாக இருக்கவேண்டும். இலங்கை அரசு அமைத்த கற்றுக்கொண்ட பாடங்கள் மற்றும் நல்லிணக்க ஆணைக்குழுவின் அறிக்கையின் முடிவுகளையும், பரிந்துரைகளையும் ஏற்று இலங்கையில் நல்லிணக்கம் ஏற்படுத்தப்படவேண்டும்.

சட்டத்துக்கு முரணாக மேற்கொள்ளப்பட்டதாக கருதப்படும் படுகொலைகள் மற்றும் ஏராளமான பேர் காணாமல் போனதாக கூறப்படும் குற்றச்சாட்டுகள் குறித்து பாரபட்சமற்ற விசாரணை மேற்கொள்ளப்படவேண்டும்.

இலங்கையின் வடக்கு பகுதியில் இருந்து ராணுவம் விலக்கிக் கொள்ளப்படவேண்டும். தமிழர்கள் நிலம் தொடர்பான பிரச்சினைக்கு தீர்வு காண பாரபட்சமற்ற விசாரணை முறையை உருவாக்க வேண்டும். தடுத்து வைத்தல் தொடர்பான கொள்கைகளை மறு ஆய்வு செய்வதோடு சுயாதீனமான சிவில் சமூக கட்டமைப்புகளை பலப்படுத்த வேண்டும்.

மாகாணங்களுக்கு அதிகாரங்களை பரவலாக்குதல் மூலம் இனப்பிரச்சினைக்கு தீர்வு காண்பதோடு அனைவரின் கருத்து சுதந்திரத்தையும் பாதுகாத்து மேம்படுத்த வேண்டும். சட்ட ஆட்சிமுறை தொடர்பான சீர்திருத்தங்களை மேற்கொள்ள வேண்டும்.

சர்வதேச சட்ட விதிகள் தீவிரமாக மீறப்பட்டது குறித்து இலங்கை அரசு அமைத்த குழு போதுமான அளவு கவனம் செலுத்தவில்லை என்பதையும் கவனத்தில் கொள்ளவேண்டும். அந்த குழுவின் அறிக்கையில் தெரிவிக்கப்பட்டு உள்ள ஆக்கப்பூர்வமான பரிந்துரைகளை நடைமுறைப்படுத்துவதுடன் நீதி, பொறுப்பு கூறுதல், இலங்கையில் வசிக்கும் அனைத்து தரப்பு மக்களுக்கும் நல்லிணக்கத்தை உறுதிப்படுத்துதல் ஆகியவற்றுக்கு தேவையான நடவடிக்கைகளை எடுக்கவும், சட்ட ரீதியிலான கடமைகளையும், பொறுப்புகளையும் நிறைவேற்ற இந்த தீர்மானம் இலங்கை அரசை கேட்டுக்கொள்கிறது.

மேலும் அந்த குழுவின் பரிந்துரைகளை நடைமுறைப்படுத்துவது தொடர்பாக இதுவரை எடுக்கப்பட்ட மற்றும் தொடர்ந்து எடுக்கப்பட உள்ள விவரங்கள் அடங்கிய விரிவான செயல்திட்டத்தை இலங்கை அரசு விரைவில் முன்வைப்பதோடு, சட்ட விதிகள் மீறப்பட்டது குறித்த குற்றச்சாட்டுகள் மீது கவனம் செலுத்தவேண்டும்.

மேற்கூறிய திட்டங்களை நடைமுறைப்படுத்துவதற்கு உரிய ஆலோசனைகளையும், தொழில்நுட்ப உதவிகளையும் ஐ.நா.மனித உரிமைகள் ஆணையம் வழங்க வேண்டும். அதை இலங்கை அரசாங்கம் ஏற்றுக்கொள்ள வேண்டும்.

ஐ.நா.மனித உரிமை ஆணையம் இதை கண்காணித்து ஐ.நா.மனித உரிமை குழுவின் 22-வது கூட்டத்தில் அறிக்கை தாக்கல் செய்ய வேண்டும்.

இவ்வாறு அந்த தீர்மானத்தில் கூறப்பட்டு உள்ளது.

திட்டமிடப்பட்டதற்கு ஒரு வாரம் முன்னதாகவே அமெரிக்காவின் தீர்மானம் ஐ.நா. மனித உரிமைகள் குழுவில் தாக்கல் செய்யப்பட்டு விட்டதால் இலங்கை அரசு அதிர்ச்சியிலும், குழப்பத்திலும் ஆழ்ந்துள்ளதாக தகவல்கள் வெளியாகி உள்ளன.

முக்கிய அதிகாரிகள் சிலரை இலங்கை அரசு ஜெனீவாவுக்கு அனுப்ப இருக்கிறது. அதிபர் ராஜபக்சேவின் சிறப்பு தூதரும், ஜெனீவா குழுவுக்கான தலைவருமான மகிந்தா சமரசிங்கே விரைவில் ஜெனீவா செல்ல இருக்கிறார். தீர்மானத்தின் மீதான விவாதத்துக்கு அவர் பதில் அளித்து பேசுவார்.

அமெரிக்காவின் இந்த தீர்மானத்தில் திருத்தங்களை செய்யும் வாய்ப்பு உறுப்பு நாடுகளுக்கு வழங்கப்படும் என்பதால் தீர்மானத்தை தோற்கடிக்க முடியாமல் போனாலும் அதன் தீவிரத்தன்மையை குறைக்க இலங்கை அரசு தீவிர முயற்சி செய்யும் என்று கருதப்படுகிறது.