விழியே பேசு...: சோனியாவுடன் மு.க.அழகிரி, தயாநிதி சந்திப்பு

Monday, March 7, 2011

சோனியாவுடன் மு.க.அழகிரி, தயாநிதி சந்திப்பு

அகில இந்திய காங்கிரஸ் தலைவர் சோனியா காந்தியுடன், திமுகவைச் சேர்ந்த மத்திய அமைச்சர்கள் மு.க.அழகிரி, தயாநிதி மாறன் ஆகியோர் சந்திதுப் பேச்சுவார்த்தை நடத்தினர்.

சட்டமன்ற தேர்தல் தொகுதிப் பங்கீட்டில் நிபந்தனைகள் விதித்து திமுகவுக்கு காங்கிரஸ் நெருக்கடி கொடுத்ததால், மத்திய அரசில் இருந்து திமுக விலகுவது என, முதல் அமைச்சர் கருணாநிதி தலைமையில் நடைபெற்ற திமுக உயர்நிலை செயல்திட்டக் குழு கூட்டத்தில் முடிவு எடுக்கப்பட்டது.

அதன்படி பிரதமர் மன்மோகன் சிங்கை சந்தித்து ராஜினாமா கடிதத்தை கொடுப்பதற்காக மத்திய அமைச்சர்கள் மு.க.அழகிரி, தயாநிதி மாறன், இணை அமைச்சர்கள் ஜெகத் ரட்சகன், நெப்போலியன், காந்தி செல்வன், பழனி மாணிக்கம் ஆகியோர் டெல்லியில் முகாமிட்டுள்ளனர்.

இந்நிலையில் முதல் அமைச்சர் கருணாநிதியுடன் மத்திய நிதி அமைச்சர் பிரணாப் முகர்ஜி, திங்கள்கிழமை (07.03.2011) மதியம் 1 மணி அளவில் தொலைபேசியில் தொடர்பு கொண்டு பேசினார். அப்போது மத்திய அரசில் இருந்து விலகுவதாக திமுக எடுத்துள்ள முடிவை மறுபரிசீலனை செய்யுமாறும், இந்த பிரச்சனைக்கு தீர்வு காண வேண்டும் என்றும் பிரணாப் முகர்ஜி வேண்டுகோள் விடுத்தார்.

இதனைத் தொடர்ந்து டெல்லியில் உள்ள திமுக மத்திய அமைச்சர்களுடனும், காங்கிரஸ் தலைவர் சோனியா காந்தியுடனும் பிரணாப் முகர்ஜி பேச்சுவார்த்தை நடத்தினார்.

இதையடுத்து சென்னையில் செய்தியாளர்களிடம் பேசிய துணை முதல் அமைச்சர் மு.க.ஸ்டாலின், மத்திய அமைச்சர் பிரணாப் முகர்ஜி, முதல்வர் கருணாநிதியுடன் இரண்டு முறை தொலைபேசியில் பேசியிருக்கிறார். கூட்டணி குறித்து பேச்சுவார்த்தை நடத்த காங்கிரஸ் கட்சி மேலும் ஒருநாள் அவகாசம் கேட்டுள்ளது. எனவே திமுக மத்திய அமைச்சர்கள் ராஜினாமா செய்வது குறித்து நாளை முடிவு செய்யப்படும் என்றார்.

இதனிடையே டெல்லியில் செய்தியாளர்களிடம் பேசிய குலாம் நபி ஆசாத், திமுக காங்கிரஸ் உறவில் இதுவரை முறிவு ஏற்படவில்லை. திமுக காங்கிரஸ் தலைவர்கள் பேச்சுவார்த்தையில் நல்ல முடிவு எட்டப்படும் என்றார்.

பரபரப்பான அரசியல் சூழ்நிலையில் திங்கள்கிழமை இரவு அகில இந்திய காங்கிரஸ் தலைவர் சோனியா காந்தியுடன், திமுகவைச் சேர்ந்த மத்திய அமைச்சர்கள் மு.க.அழகிரி, தயாநிதி மாறன் ஆகியோர் சந்திதுப் பேச்சுவார்த்தை நடத்தினர். இந்த பேச்சுவார்த்தையின்போது திமுக காங்கிரஸ் தொகுதி உடன்பாடு குறித்து ஆலோசனை நடத்தப்பட்டது.

இன்றைய பதிவுகள்...