மீண்டும் விஜயுடன் இணையும் ஆர்யா

ஆர்யாவுக்கு மதராசபட்டினம் என்ற மாபெரும் வெற்றி படத்தை கொடுத்த டைரக்டர் விஜய், மீண்டும் ஆர்யாவை வைத்து ஒரு படம் இயக்க போகிறார்.

இந்தியா சுதந்திரம் அடைவதற்கு முன்னர் சென்னை நகரத்தை அப்போதைய காலகட்டத்திற்கு ஏற்றவாறு காட்சி அமைப்புகளை எடுத்து, அதில் ஒரு காதல் கதையை வித்யாசமாக கொடுத்து வெற்றி பெற்றவர் விஜய். இப்படத்தின் நாயகனாக ஆர்யாவும், நாயகியாக எமி ஜாக்சனும் நடித்து இருந்தனர். கடந்த ஆண்டு வெளிவந்த படங்களில் மாபெரும் வெற்றி பெற்ற ஒரு சில படங்களில் மதராசபட்டினம் படமும் ஒன்று. இப்படத்திற்கு பிறகு பிரபல டைரக்டர்கள் வரிசையில் ‌சேர்ந்த விஜய், அடுத்து விக்ரமை வைத்து தெயவத்திருமகள் என்ற படத்தை எடுத்துள்ளார். இப்படம் அடுத்த மாதம் திரைக்கு வர இருக்கிறது. இதற்கு அடுத்தபடியாக மீண்டும் ஆர்யாவை வைத்து விஜய், ஒரு படம் இயக்கபோவதாக தகவல் வெளியாகியுள்ளது.

தற்போது ஆர்யா வேட்டை படத்தில் பிஸியாக இருக்கிறார். இப்படத்தை முடித்த பின்னர் விஜய் படத்தில் நடிப்பார் எனத் தெரிகிறது. மதராசபட்டினம் படத்தில் பணியாற்றிய அதே டெக்னீசியன்களே இந்தபடத்திலும் பணியாற்ற இருக்கின்றனர். படத்திற்கான நாயகி, மற்ற நடிகர், நடிகைக்கான அறிவிப்பு விரைவில் வெளியாக இருக்கிறது.