எதிர்க்கட்சி தலைவர் "சென்டிமென்ட்' : தே.மு.தி.க.,வினரின் எதிர்கால கணக்கு

அண்ணா, ஜெயலலிதா வரிசையில் சட்டசபை எதிர்க்கட்சி தலைவர், "சென்டிமென்ட்' தங்கள் தலைவரை எதிர்காலத்தில் தமிழக முதல்வராக்கும் என, தே.மு.தி.க.,வினர் உற்சாகம் அடைந்துள்ளனர். பல்வேறு அரசியல் சூழல்களை கடந்து அ.தி.மு.க.,வுடன், தே.மு.தி.க., நம்பிக்கையோடு கூட்டணி வைத்தது. அக்கட்சியின் மீதான நம்பிக்கையில் அ.தி.மு.க., 41 தொகுதிகளை தே.மு.தி.க.,விற்கு ஒதுக்கி, கூட்டணியில் பிரதான அங்கீகாரம் அளித்தது.

தங்களுக்கு கிடைத்த 41 தொகுதிகளில், 10 முதல் 15 இடங்களில் வெற்றி பெற்றாலே, அரசியலில் போதிய அங்கீகாரத்தை பெற்று விடலாம் என்ற நம்பிக்கையில், ஆளும் கட்சியினரின் விமர்சனங்கள் மற்றும் தரக்குறைவான பிரசாரங்களை ஒதுக்கி வைத்த தே.மு.தி.க.,வினர் உற்சாகமாக உழைத்தனர்.

இந்நிலையில், கடந்த ஆளும் கட்சியின் மீதான கோபத்தாலும், அ.தி.மு.க., மீதான அபிமானத்தாலும் அடித்த, "மக்கள் சுனாமி'யால் நிலைமை தலைகீழானது. விளைவு, தி.மு.க.,விற்கு எதிர்க்கட்சிக்குரிய அங்கீகாரம் பெறுவதற்குரிய ஆதரவு கூட கிடைக்கவில்லை. எதிர்பாராத திருப்பத்தால், 29 தொகுதிகளில் வெற்றி பெற்ற தே.மு.தி.க., சட்டசபையின் பிரதான எதிர்க்கட்சியானது.

அக்கட்சியின் அனுபவம் வாய்ந்த மூத்த எம்.எல்.ஏ., பண்ருட்டி ராமச்சந்திரன் ஆலோசனை பேரில், அதன் தலைவர் விஜயகாந்த் இப்போது, சட்டசபை எதிர்க்கட்சி தலைவராகி உள்ளார். கடந்த காலத்தில் தமிழகத்தில் நடந்த காங்கிரஸ் ஆட்சியின் போது, அண்ணா பிரதான எதிர்க்கட்சி தலைவராக பொறுப்பேற்று பணியாற்றி இருக்கிறார்.

அதன்பின் சிறப்பான செயல்பாடு காரணமாக, தமிழக முதல்வராக பதவி வகித்து, வடமாநிலங்களின் கவனத்தை தமிழகத்தின் மீது திரும்ப வைத்தார். இதையடுத்து, கடந்த 1989 முதல் 1991ம் ஆண்டு வரை நடந்த தி.மு.க., ஆட்சியின் போது, ஜெயலலிதா பிரதான எதிர்க்கட்சி தலைவராக பணியாற்றினார். இதையடுத்து அவரும் தமிழக முதல்வரானார். இப்போது தனிப்பெரும்பான்மையுடன் மூன்றாவது முறையாக முதல்வராகி உள்ளார். மேற்கண்ட, "சென்டிமென்ட்' பின்னணியை கருத்தில் கொண்ட தே.மு.தி.க.,வினர், தங்கள் தலைவரும் எதிர்காலத்தில் தமிழக முதல்வராவார் என்று கணக்கு போட்டு உற்சாகமடைந்துள்ளனர்.

அதிர்ஷ்டம் உண்டு : எம்.ஜி.ஆருக்கு பின் அரசியல் கட்சிகளை துவங்கிய சிவாஜி, பாக்யராஜ், டி.ராஜேந்திரன், கார்த்திக் போன்ற பிரபலங்கள் அரசியலில் வெற்றி பெற முடியவில்லை என்பது குறிப்பிடத்தக்கது. கடந்த 2006 தேர்தலில் ஒரே ஒரு எம்.எல்.ஏ.,வாக சட்டசபைக்கு சென்ற விஜயகாந்த், இன்று மேலும் 28 பேருடன் எதிர்க்கட்சி தலைவராகி இருக்கிறார். எதிர்காலத்தில் அவர் முதல்வராகவும் வாய்ப்புள்ளது. அதற்கு காரணம் கடுமையான உழைப்பு மட்டுமல்ல, கடவுளின் ஆசியுடன் கூடிய அதிர்ஷ்டமும் கூடத்தான் என்று அக்கட்சியினர் புல்லரிக்கின்றனர்.