அரசியல் பிரவேசம் : நடிகர் விஜய் மழுப்பல்...!

மதுரையில் நிருபர்களை சந்தித்த நடிகர் விஜய், "அரசியலுக்கு வருவீர்களா என்ற கேள்விக்கு, நேரடியாக பதிலளிக்க மறுத்து விட்டார். மதுரையில் ஷைன் சிறப்பு பள்ளி மன வளர்ச்சி குன்றிய மாணவர்களிடம் கலந்துரையாட வந்த நடிகர் விஜய், நிருபர்களுக்கு பேட்டி அளித்தார். வழக்கம் போல் நிருபர்கள்,"அரசியலுக்கு எப்போது வருவீர்கள்? என்று கேட்டனர். அதற்கு விஜய்,""இப்போது சினிமா பற்றி மட்டும் கேளுங்கள்; நான் வருகிறேன். இன்னொரு நிருபர்கள் சந்திப்பில் சொல்கிறேன், என்றார். "நான் வருகிறேன், என்பது அரசியலுக்கு வருவதா என, நிருபர்கள் திருப்பிக் கேட்க,""மதுரைக்கு அடுத்து வருகிறேன். அப்போது சொல்கிறேன் என்று சொன்னேன், என்றார்.அன்னா ஹசாரேக்கு ஆதரவு தெரிவித்தீர்கள்; ஊழலுக்கு எதிராக தமிழகத்தில் இயக்கம் துவங்குவீர்களா? என்ற கேள்விக்கும், "பிறகு சொல்கிறேன் என்றார் மழுப்பலாக.

தடியடி: மதுரை காளவாசலில் விஜய் தங்கியிருந்த ஓட்டல் முன், ரசிகர்கள் கூடினர். இதனால், போக்குவரத்து நெரிசல் ஏற்பட்டது. போலீசார் இரண்டுமுறை லேசான தடியடி நடத்தி கலைத்தனர்.