சேலம் தேமுதிக மாநாட்டில் மக்களை ஏமாற்றிய விஜயகாந்த்

தேமுதிகவினர் மட்டுமல்லாமல் ஒட்டுமொத்த அரசியல் வட்டாரமும் பெரும் எதிர்பார்ப்பில் உள்ள சேலம் தேமுதிக மாநில மாநாடு இன்று பிற்பகல் தொடங்கியது. 

கட்சி தொடங்கிய பின்னர் பெரிய அளவில் மாநாடு எதையும் நடத்தவில்லை தேமுதிக. மாறாக வருகிற தேர்தல்களில் எல்லாம் தனியாக போட்டியிடுவதும், ஆங்காங்கே ஆர்ப்பாட்டங்கள், உண்ணாவிரதங்கள் போன்றவற்றை நடத்துவதிலும் கட்சியை வழிகாட்டி வந்தார் விஜயகாந்த்.

தமிழக அரசியலில் தான் ஒரு தவிர்க்க முடியாத சக்தி என்பதை ஆணி்த்தரமாக இல்லாவிட்டாலும் கூட, ஓரளவு நிரூபித்து விட்டார் விஜயகாந்த். இதையடுத்து அவருடன் கூட்டணி சேர கட்சிகளுக்குள் கடும் போட்டா போட்டி.

இந்த நிலையில் சட்டசபைத் தேர்தல் நெருங்குவதையொட்டி கட்சியினரை உற்சாகமூட்டும் வகையில் வீரபாண்டியாரின் கோட்டையாக கருதப்படும் சேலத்தில் பிரமாண்ட மாநில மாநாட்டுக்கு ஏற்பாடு செய்திருந்தார் விஜயகாந்த்.
கூட்டணி பற்றிய அறிவிப்பை சேலம் மாநாட்டில் அறிவிப்பேன் என்று கூறி இருந்தார். இதன் காரணமாக தேமுதிகவினர் பெரும் எதிர்பார்ப்புடன் சேலத்தில் குவிந்துள்ளனர். மாநாட்டையொட்டி சேலமே தேமுதிகவினர் முற்றுகையால் திமிலோகப்பட்டு வருகிறது.

மாநாட்டுக்காக பிரமாண்ட பந்தலும், மேடையும் போடப்பட்டுள்ளது. எங்கு பார்த்தாலும் விஜயகாந்த்தின் பளிச் சிரிப்பு போஸ்டர்களும், டிஜிட்டல் பேனர்களும் காணப்பட்டன .

மாநாட்டுக்குப் போலீஸ் பாதுகாப்பு  போடப்பட்டிருந்தாலும் கூட, அதிமுக பாணியில், தேமுதிகவும், சிறப்புப் பாதுகாப்புப் படையை தனது தொண்டர்களைக் கொண்டு அமைத்திருந்தது

நாமக்கல் சாலையில் வீராசாமிபுதூரில் மக்கள் உரிமை மீட்பு மாநாடு என்ற பெயரில் ஏற்பாடு செய்யப்பட்டிருந்த இந்த மாநாடு இன்று பிற்பகல் தொடங்கியது. கட்சித் தலைவர் விஜயகாந்த் கட்சிக் கொடியை ஏற்றி வைத்து மாநாட்டைத் தொடங்கி வைத்தார்.

அப்போது மனைவி பிரேமலதா, அவைத் தலைவர் பண்ருட்டி ராமச்சந்திரன் உள்ளிட்டோர் உடன் இருந்தனர். 

பின்னர் கலை நிகழ்ச்சிகள் தொடங்கின. மாலை 5 மணிக்கு மேல் கட்சி நிர்வாகிகள் பேசத் தொடங்கினர். பேச்சாளர்கள் அனைவரும் சொல்லி வைத்தாற் போல திமுகவையும், திமுக அரசையும் கடுமையாக சாடிப் பேசினர். ஒருவர் கூட அதிமுகவையோ, முந்தைய அதிமுக ஆட்சிகள் குறித்தோ ஒரு வார்த்தை கூட பேசவில்லை.

விஜய காந்த் பேசும்போது திமுகவையும் அதன் தலைமையையும் எந்த அளவுக்கு முடியுமோ அந்த அளவுக்கு கடுமையாக தாக்கி பேசினார். சேலம் மாநாட்டில் யாருடன் கூட்டணி என்பது பற்றி அறிவிப்பேன். என்று சொல்லி ஒட்டுமொத்த தமிழகத்தையும் சேலம் மாநாட்டை உற்று நோக்க வைத்து சேலம் மாநாடுக்கு தொண்டர்களை உற்சாகத்துடன் வர வைத்த விஜயகாந்த். ஒட்டு மொத்த பேரின் எதிர்பார்ப்பையும் பொய்யாக்கி விட்டார். கூட்டணி பற்றிய அறிவிப்பை வெளியிடுகிறேன். என்று சொல்லி சேலம் மாநாட்டுக்கு கூட்டம் சேர்த்த விஜயகாந்த் 'கூடனி பற்றி நான் முடிவெடுப்பேன். நீங்கள் பயப்பட வேண்டாம். உங்கள் தன்மானத்திற்கு களங்கம் ஏற்படுத்துவது போன்று எந்த முடிவையும் எடுக்க மாட்டேன்' என்று ஏதேதோ சொல்லி தானும் குழம்பி தொண்டர்களையும் குழப்பி விட்டு மாநாட்டை முடித்து கொண்டார். மொத்தத்தில் விஜயகாந்த் கூட்டணி முடிவை அறிவிப்பேன் என்று சொல்லி ஒட்டு மொத்த போரையும் ஏமாற்றி விட்டார்.