ஜெயலலிதா கழுத்தை அறுத்துவிட்டார்: கார்த்திக்

ஜெயலலிதா, என்னை நம்ப வைத்து கழுத்தை அறுத்துவிட்டார் என, நடிகர் கார்த்திக் பேசினார்.

நாடாளும் மக்கள் கட்சி நிறுவன தலைவரும், நடிகருமான கார்த்திக் வி.கே.புரம், பாளையங்கோட்டை ஆகிய பகுதிகளில் நடந்த பிரசாரம் மேற்கொண்டார். அப்போது பேசிய அவர்,

ஊழலைப் பற்றி பேசுவதற்கு அதிமுகவுக்கு அருகதை கிடையாது. அதிமுகவுடன் கூட்டணி சேர்ந்துள்ள தேமுதிக தலைவர் விஜயகாந்த் மிகவும் நல்லவர்தான். ஆனால், இப்போது கூட்டங்களில் உளறிக் கொண்டிருக்கிறார். அதிமுகவுடன் கூட்டணி சேர்ந்ததால்தான் அவர் உளறுகிறார். ஜெயலலிதா, என்னை நம்ப வைத்து கழுத்தை அறுத்துவிட்டார். என் தலையில் மிளகாய் அரைத்து விட்டார்கள்.

இவர்களது குணம் தெரியாமல் 2 மாதத்துக்கு முன்பு அவர்களைப் பற்றி புகழ்ந்து பேசிவிட்டேன். அதிமுக தலைவியை ஒரு கும்பல் ஆட்டிப் படைத்து வருகிறது. அந்த கும்பல் கூறுவதைத்தான் அவர் கேட்கிறார். கரும்பு கூட்டத்தில் புகுந்த யானை மாதிரி அதிமுகவில் அந்த கும்பல் இருந்து வருகிறது.

முதல்வர் கலைஞரை மரியாதை இல்லாமல் ஜெயலலிதா பேசி வருகிறார். பேச்சில் ஒரு நாகரிகம் வேண்டும். தமிழகத்தில் பிறந்தவர்களுக்குத்தான் நாகரிகம், பண்பு தெரியும். கடந்த தேர்தலில் எங்கள் கட்சியால் பல இடங்களில் தோற்கடிக்கப்பட்ட அதிமுக, இம்முறையும் வீழ்ச்சியை சந்திக்கும் என்றார்.