கமல் - ஸ்ரீதேவி மீண்டும் ஜோடி..?

'மன்மதன் அம்பு' படத்தை அடுத்து கமல் நடிக்க ஒப்பந்தம் ஆகியிருக்கும் படம் 'விஸ்வரூபம்'. இப்படத்தை செல்வராகவன் இயக்க இருக்கிறார்.

படத்தின் முதல் நாயகியாக ஒப்பந்தம் ஆனார் சோனாக்ஷி சின்கா. படப்பிடிப்பு தொடங்க இருந்த நேரத்தில் அமெரிக்கன் விசா மறுக்கப்படவே படப்பிடிப்பு தள்ளி வைக்கப்பட்டுள்ளது.

இந்நிலையில் இன்னொரு நாயகிக்கு ஸ்ரீதேவியிடன் பேசி வருவதாக தகவல்கள் வெளியாகியுள்ளது.

கமலும்  ஸ்ரீதேவியும் ஏற்கனவே 1970 - 1980 காலகட்டங்களில் பல்வேறு திரைப்படங்களில் இணைந்து நடித்துள்ளனர். அப்படங்கள் பெரிய வெற்றி பெற்று, ராசியான ஜோடி என தயாரிப்பாளர்களால் பல படங்களில் ஒப்பந்தம் செய்யப்பட்டனர்.

பின்னர் ஸ்ரீதேவி ஹிந்தி படங்களில் நடிக்கத் தொடங்கினார். அங்கு அவருக்கு கிடைத்த வரவேற்பால், தமிழ் படங்களில் நடிப்பதை குறைந்துக் கொண்டார். ஸ்ரீதேவி கடைசியாக ரஜினிகாந்துடன் 1986-ல்  'நான் அடிமை இல்லை' படத்தில் நடித்தார்.

 இந்தி திரையுலகில் பல வருடங்கள் முன்னணி நடிகையாக வலம் வந்த ஸ்ரீதேவி, அனில் கபூரின் அண்ணன், தயாரிப்பாளர் போனி கபூரை காதலித்து திருமணம் செய்து கொண்டார்.  திருமணத்திற்குப் பின்  பெரிய திரையில் நடிப்பதை தவிர்த்து வந்தார் ஸ்ரீதேவி.

மாப்பிள்ளை படத்தில் மனிஷா கொய்ராலா நடித்த மாமியார் வேடத்தில் நடிக்க முதலில் ஸ்ரீதேவியை தான் அணுகினார்கள். ஆனால் அப்படத்தில் நடிக்க விரும்பவில்லை என்று மறுத்துவிட்டார்.

இந்நிலையில் கமலுக்கு ஜோடியாக நடிக்க அவரை அணுகி இருக்கிறார்கள்.  மீண்டும் நிகழுமா கமல்-ஸ்ரீதேவி மேஜிக்..?