விஜயகாந்த் வராததால் ஜெ. தலை தப்பியது: ஸ்டாலின்

கொளத்தூர் தொகுதியில் திமுக பொருளாளர் மு.க.ஸ்டாலின் போட்டியிடுகிறார். கொளத்தூர் தொகுதியில் பிரச்சாரம் மேற்கொண்ட மு.க.ஸ்டாலின் தனியார் தொலைக்காட்சி ஒன்றுக்கு அளித்த பேட்டியில்,

திமுக கூட்டணிக்கு பொதுமக்களிடமிருந்து நாளுக்கு நாள் ஆதரவு அதிகரித்துள்ளது. குறைந்தது 200 முதல் 215 தொகுதிகளில் திமுக கூட்டணி வருவதற்கான வாய்ப்புகள் என் கண்ணுக்கு தெரிகிறது. நிச்சயமாக திமுக ஆட்சியை கலைஞர் தலைமையில் மீண்டும் தொடருவதற்காக மக்கள் உத்தரவிடுவதற்கு தயாராக இருக்கிறார்கள்.

கலைஞரின் 5 ஆண்டுகால சாதனைகளும், திட்டங்களும் மக்களை சென்றடைந்துள்ளது. வெறும் திட்டங்களாக மட்டுமல்ல அவைகள் முறையாக மக்களை சென்றடைந்துள்ளது. ஆகையால் மிகப்பெரிய எழுச்சி. மகிழ்ச்சி. இந்த தேர்தலில் மாபெரும் வெற்றியை கலைஞருக்கு மக்கள் வழங்க இருக்கிறார்கள் என்றார்.

நீங்கள் சொன்னதை செய்தோம். சொல்லாததையும் செய்தோம் என்று சொல்லி பிரச்சாரம் மேற்கொண்டு வருகிறீர்கள். ஆனால் எதிர்க்கட்சியினர் எப்படி பிரச்சாரம் செய்கிறார்கள். எதிரணி கூட்டணியில் ஒற்றுமை இல்லை என்று மக்கள் சொல்லுகிறார்கள் இதைப்பற்றி என்ன நினைக்கிறீர்கள் என்ற கேள்விக்கு பதில் அளித்த மு.க.ஸ்டாலின்,

எதிரணியில் உள்ளவர்கள் செய்ததை சொல்ல முடியாது. ஏனென்றால் எதையும் செய்யவில்லை. சொன்னதையும் திருப்பி சொல்ல முடியாது. ஏனென்றால் சொன்னதெல்லாம் கலைஞர் சொன்னதை அப்படியே திருப்பி சொல்லியிருக்கிறார்கள். ஆகையால் அவர்கள் தனி நபர் விமர்சனத்தை திட்டமிட்டு செய்கிறார்கள். அதை மக்கள் ஏற்றுக்கொள்வதாக இல்லை என்றார்.

எதிரணி கூட்டணியில் ஒற்றுமை இல்லாத நிலை உள்ளது. கோவை பொதுக்கூட்டத்தில் விஜயகாந்த் மட்டும் கலந்து கொள்ளவில்லையே என்ற கேள்விக்கு பதில் அளித்த மு.க.ஸ்டாலின்,

அந்த மேடைக்கு விஜயகாந்த் வராதது, ஜெயலலிதாவின் தலை தப்பியது. அவ்வளவுதான் என்றார்.