ரஜினி உடல்நிலையில் நல்ல முன்னேற்றம்: இயல்பு நிலைக்கு திரும்புகிறார்!

தீவிர சிகிச்சைப் பிரிவில் அளிக்கப்பட்டு வரும் தொடர் சிகிச்சை காரணமாக, நடிகர் ரஜினிகாந்த் உடல்நிலையில் நல்ல முன்னேற்றம் ஏற்பட்டு, அவர் இயல்பு நிலைக்கு திரும்புகிறார். நேற்று முதல் அவருக்கு வழக்கமான உணவு கொடுக்கப்படுகிறது. இருப்பினும், பார்வையாளர்கள் தொந்தரவு, நோய்த் தொற்று ஆகியவற்றை தவிர்ப்பதற்காக, தொடர்ந்து தீவிர சிகிச்சை பிரிவில் வைக்கப்பட்டுள்ளார்.

உடல்நிலை பாதிப்பு காரணமாக, கடந்த 13ம் தேதி போரூர் ஸ்ரீ ராமச்சந்திரா மருத்துவமனையில் அனுமதிக்கப்பட்ட நடிகர் ரஜினிகாந்திற்கு, அங்கு தொடர்ந்து தீவிர சிகிச்சைப் பிரிவில் சிகிச்சை அளிக்கப்பட்டு வருகிறது. சிறுநீரக செயல்பாடு மந்தமான நிலையில், கடந்த இரு தினங்களுக்கு முன் ரஜினிக்கு அல்ட்ரா பில்ட்ரேஷன் ஹீமோ டயாலிசிஸ் சிகிச்சை மேற்கொள்ளப்பட்டது. இதையடுத்து, ரத்தத்தில் அதிகரித்திருந்த "கிரியேட்டின் அளவு குறையத் துவங்கியது. இந்த சிகிச்சையைத் தொடர்ந்து, ரஜினியின் உடல்நிலையில் லேசான முன்னேற்றம் ஏற்பட்டது. அவருக்கு கொடுக்கப்படும் மாத்திரை, மருந்துகளை உடல் முறையாக ஏற்றுக் கொள்வதால், உடல்நிலையில் நேற்று நல்ல முன்னேற்றம் ஏற்பட்டது. தொடர்ந்து அவர் தீவிர சிகிச்சைப் பிரிவில் இருந்தாலும், தனது மனைவி, மகள்களுடனும், மருத்துவக் குழுவினருடன் வழக்கம் போல பேசினார். நேற்று முதல் வழக்கமான உணவும் அவருக்கு கொடுக்கப்பட்டு வருகிறது.

இது குறித்து ராமச்சந்திரா மருத்துவமனை வெளியிட்டுள்ள செய்திக்குறிப்பில், "நோய் குறித்த மருத்துவ ஆய்வுகளும், அதற்கான சிகிச்சைகளும் சிறப்பாக உள்ளதால், நடிகர் ரஜினிகாந்த் மீண்டும் தனது இயல்பு நிலைக்கு திரும்பி வருகிறார். இருப்பினும், நேற்றும் அவரை பார்க்க பார்வையாளர்கள் யாரும் அனுமதிக்கப்படவில்லை. நேற்று முழுவதும் அவர் தனது குடும்பத்தினருடன் பேசி பொழுதைக் கழித்தார். நேற்று முதல் வழக்கமான உணவை எடுத்துக் கொண்டார். பார்வையாளர்கள் தொந்தரவை தவிர்க்கவும், நோய்த் தொற்று ஏற்படாமல் இருக்கவும் மட்டுமே அவர் தொடர்ந்து தீவிர சிகிச்சைப் பிரிவில் வைத்து கண்காணிக்கப்படுகிறார் என்று கூறப்பட்டிருந்தது. ரஜினி உடல்நிலையில் ஏற்பட்டுள்ள நல்ல முன்னேற்றத்தைத் தொடர்ந்து, அவர் ஓரிரு தினங்களில் தனி வார்டுக்கு திரும்புவார் என்று எதிர்பார்க்கப்படுகிறது.