கனிமொழி கைது எதிரொலி: தி.மு.க.,வில் சலசலப்பு ; காங்கிரசுக்கு ஆதரவாக அழகிரி

கனிமொழி கைது செய்யப்பட்டதைத் தொடர்ந்து, காங்கிரசுடனான கூட்டணியை தொடர்வதில் தி.மு.க., தலைவர்களிடையே கருத்து வேறுபாடு ஏற்பட்டுள்ளது. சட்டசபை தேர்தலில் தொகுதிகள் ஒதுக்குவதில் காங்கிரசுடன் ஏற்பட்ட கசப்பு, தேர்தல் தோல்வியில் அதிகரித்து, கனிமொழி கைதில் எரியத் துவங்கியுள்ளது. முன்னாள் அமைச்சர் ராஜா கைதைக் கூட பெரிதாக எடுத்துக் கொள்ளாத தி.மு.க., தலைவர்களுக்கு, கட்சித் தலைவரின் மகள் கைதானதும், காங்கிரஸ் மீது தீராத கோபம் ஏற்பட்டுள்ளது.

கனிமொழி கைதுக்குப் பின், நேற்று முன்தினம் மற்றும் நேற்று கருணாநிதியுடன் நடந்த ஆலோசனையில், காங்கிரஸ் மீதான வெறுப்பை தி.மு.க., தலைவர்கள் கொட்டியுள்ளனர். "மத்தியில் இரண்டு முறை ஆட்சி அமைக்க உதவியாக இருந்த நமக்கு, இப்படியொரு துரோகத்தை செய்து விட்டனரே' என, காங்கிரஸ் மீது குற்றம் சுமத்திப் பேசியுள்ளனர்.

வழக்கை சந்திக்கத் தயாராக உள்ளபோது, காங்கிரஸ் கூட்டணி எதற்கு? என்று தலைமையிடம் அவர்கள் கேள்வி எழுப்பியதாகவும் கூறப்படுகிறது. ஆனால், தி.மு.க.,வின் ஒரு சில தலைவர்கள், காங்கிரஸ் கூட்டணியை துண்டித்துக்கொள்ளக் கூடாது என தலைமையிடம் வலியுறுத்தி வருகின்றனர். மத்திய அரசிலிருந்து வெளியேறுவது எந்த வகையிலும் கட்சிக்கு உகந்தது அல்ல எனவும் அவர்கள் கூறியுள்ளனர்.

ஸ்பெக்ட்ரம் வழக்கு விசாரணை, சுப்ரீம் கோர்ட் கண்காணிப்பில் நடந்து வருகிறது. இதில், காங்கிரசின் பங்கு எதுவும் இல்லை. எனவே, காங்கிரஸ் மீது குற்றம் சுமத்தி, கூட்டணியிலிருந்து விலகுவது சரியல்ல எனவும் அத்தலைவர்கள் தெரிவித்து உள்ளதாகத் தெரிகிறது.

இதற்கிடையே, கோபாலபுரம் இல்லத்தில் கருணாநிதியை, மத்திய அமைச்சர் அழகிரி நேற்று சந்தித்தார். கனிமொழி கைது மற்றும் காங்கிரஸ் உறவு ஆகியன குறித்து, அப்போது அவர் ஆலோசனை நடத்தியதாகத் தெரிகிறது.

காங்கிரஸ் உறவைத் தொடர வேண்டும் என்பதில், அழகிரி உறுதியாக இருப்பவர். தேர்தலில், தொகுதிப் பங்கீட்டில் காங்கிரஸ் பிடிவாதமாக இருந்தபோது, அமைச்சரவையில் இருந்து வெளியேறும் தி.மு.க., முடிவை தடுத்ததோடு, காங்கிரஸ் கேட்கும் தொகுதிகளை விட்டுக்கொடுக்கும் முடிவை அறிவித்தார். எனவே, எந்த சூழ்நிலையிலும், மத்திய அரசிலிருந்து வெளியேறுவதையோ, காங்கிரஸ் உறவை துண்டித்துக் கொள்வதையோ ஒப்புக் கொள்ள அழகிரி தயாராக இல்லை என அவரது ஆதரவாளர்கள் கூறுகின்றனர்.

காங்கிரஸ் கூட்டணி தொடர வேண்டும் என்றே அழகிரியும், அவரது ஆதரவாளர்களும், கருணாநிதியிடம் வலியுறுத்தி உள்ளதாகவும் கூறப்படுகிறது.

காங்கிரசுக்கு எதிராக குரல் கொடுப்பவர்கள் இருந்தாலும், காங்கிரசுடன் உறவு தொடர வேண்டும் எனக் கூறுபவர்கள் அவர்களுக்கு சமமாக கட்சியில் இருக்கின்றனர். காங்கிரஸ் ஆதரவு நிலையை அழகிரி எடுப்பதால், எதிர்த் தரப்பினரை அவர் அடக்கி விடுவார் என்றே தெரிகிறது.