அன்னா ஹசாரேவும், அ.தி.மு.க., வெற்றியும்

தமிழக சட்டசபை தேர்தலில் தி.மு.க., எதிர்பார்த்ததைக் காட்டிலும் படுதோல்வி அடைந்துள்ளது. கடந்தாண்டுகளில் ஆளும் கட்சியாக இருந்த அக்கட்சி, இந்த தேர்தலில் எதிர்க்கட்சி அந்தஸ்தை கூட பெற முடியவில்லை. தி.மு.க.,வின் இந்த படுதோல்விக்கு பல காரணங்கள் உண்டு. ஸ்பெக்ட்ரம் ஊழல், ஆறு மணி நேர மின்வெட்டு, விலைவாசி உயர்வு, குடும்ப அரசியல் என பட்டியல் நீள்கிறது. இத்துடன் இன்னொரு காரணமும் உண்டு.

கடந்த தேர்தலில் ஓட்டளித்த வாக்காளர்கள் ஒரு மவுன புரட்சியை செய்துள்ளனர் என்பதே அரசியல் விமர்சகர்களின் கருத்தாக உள்ளது. அது உண்மையும் கூட. பத்திரிகைகளும், மீடியாக்களும் அ.தி.மு.க.,விற்கு இத்தனை இடங்கள், தி.மு.க.,விற்கு இத்தனை இடங்கள் கிடைக்கும் என, வெளியிட்ட கருத்து கணிப்புக்கள் எல்லாம் பொய்யாக்கி, அ.தி.மு.க.,விற்கு கூடுதல் இடம் கிடைத்துள்ளது. இதற்கு மக்களின் மவுனப் புரட்சி தான் காரணம். ஒரு ரூபாய்க்கு ஒரு கிலோ அரிசி, மருத்துவ காப்பீட்டு திட்டம், இலவச வீடு வழங்கும் திட்டம் என பல சிறந்த திட்டங்களை செயல்படுத்தியும் கூட தி.மு.க., அரசு தலைகுப்புற கவிழ்க்கப்பட்டதற்கு ஊழலே காரணம். "எத்தனை இலவசங்கள் கொடுத்தாலும் எங்களுக்கு ஒரு ஊழல் நிறைந்த அரசு தேவையில்லை' என்றே தமிழக மக்கள் தேர்தல் மூலம் தீர்ப்பளித்துள்ளனர். ஊழலுக்கு எதிரான மக்களின் இந்த மவுனப் புரட்சிக்கு ஒரு காரணமாக இருந்தவர் அன்னா ஹசாரே.

தமிழகம் உள்ளிட்ட ஐந்து மாநிலங்களில் தேர்தல் தேதி அறிவிக்கப்பட்டு, பிரசாரம் துவங்கி, நடந்து கொண்டிருந்த நேரத்தில் தான் அன்னா ஹசாரே பிரபலமானார். மகாராஷ்டிராவை சேர்ந்த 72 வயதான அன்னா ஹசாரே, ஒரு சமூக சேவகர். தனது ஒப்பற்ற சேவைக்காக அரசின் பல்வேறு விருதுகளை பெற்றவர். நாட்டில் பெருகி வரும் ஊழல் இவரை பாதித்தது. குறிப்பாக, ஸ்பெக்ட்ரம் உள்ளிட்ட பல லட்சம் கோடி ரூபாய் விவகாரம் அன்னா ஹசாரேவை வெகுவாக உசுப்பியது. வெள்ளையர்களை வெளியேற்றியது போல், நாட்டில் இருந்து ஊழலையும் வெளியேற்ற வேண்டும் என்று உறுதியெடுத்தார். அவரது உண்ணாவிரத வெற்றி தான் லோக்பால் மசோதா உருவாக வித்திட்டிருக்கிறது. இது ஊழல் எதிர்ப்பு இயக்கத்திற்கு கிடைத்த வெற்றி. இதனால் விழிப்புணர்வு ஏற்பட்டு, இளைஞர்கள் அன்னா ஹசாரேவுக்கு ஆதரவாக களம் இறங்கினர். தமிழகம் உட்பட நாட்டின் பல்வேறு இடங்களில் அன்னா ஹசாரேவை ஆதரித்து பேரணிகள் நடந்தன. தமிழகத்தில் தேர்தல் நடந்த நேரத்தில் நடந்த இச்சம்பவம் தி.மு.க.விற்கு பெரும் பாதிப்பை ஏற்படுத்தியது. அ.தி.மு.க., பெரும் வெற்றியை பெற உதவியது. ஊழல் மிக்க ஆட்சி நடந்தால் நாட்டின் பொருளாதார வளர்ச்சி, இறையாண்மை உள்ளிட்ட பல விஷயங்கள் சிதிலமடையும் என்பதை அன்னா ஹசாரே மூலம் தமிழக மக்கள் புரிந்து கொண்டனர். இதன் எதிரொலியாக, தமிழக அரசியல் வரலாற்றில் இல்லாத வகையில் அ.தி.மு.க., கூட்டணி 203 தொகுதிகளை பெற்றது. ஊழல் அரசு என்று மக்களால் கருதப்பட்ட தி.மு.க., அரசு படுபாதாளத்தில் தள்ளப்பட்டது. ஊழலுக்கு எதிரான தங்கள் ஆதரவை பெருவாரியான ஓட்டுகள் மூலமாக அ.தி.மு.க.,விற்கு மட்டுமல்லாமல், அன்னா ஹசாரேவுக்கும் காட்டியுள்ளனர் தமிழக மக்கள்.