சிம்புவின் வானம் ரிலீஸ் தியதி மாறியது

நடிகர் சிம்பு - அனுஷ்கா ஜோடி நடித்திருக்கும் வானம் படம் பிப்ரவரி 3ம்தேதி ரீலிஸ் ஆகவிருக்கிறது. விண்ணைத்தாண்டி வருவாயா வெற்றிப்படத்திற்கு பிறகு சிம்பு நடித்திருக்கும் படம் வானம். இப்படத்தில் இவருடன் அனுஷ்கா, பரத், சினேகா உல்லல், சோனியா அகர்வால், வேகா, பிரகாஷ்ராஜ் உள்ளிட்டோர் நடித்துள்ளனர். புதுமுக டைரக்டர் கிரிஷ் இயக்கியுள்ளார். இந்த படத்தின் சூட்டிங் இறுதிகட்டத்தை எட்டியுள்ள நிலையில் பொங்கலுக்கு ரீலிஸ் ஆகலாம் என எதிர்பார்க்கப்பட்டது. ஆனால் ஜனவரியில் ஆடியோ வெளியீடு நிகழ்ச்சியை நடத்தி விட்டு, பிப்ரவரியில் படத்தை ரீலிஸ் செய்ய திட்டமிட்டிருந்தார் தயாரிப்பாளர் கணேஷ். முதலில் பிப்ரவரி 14ம்தேதி காதலர் தினத்தில் ரீலிஸ் செய்ய திட்டமிட்டிருந்த வானம் குழுவினர், இப்போது அந்த முடிவில் இருந்து சிறிய மாற்றம் செய்துள்ளனர். அதாகப்பட்டது, வானம் படம் பிப்ரவரி 3ம்தேதி ரீலிஸ் ஆகப்போகிறது. அன்றைய தினம்தான் படத்தின் நாயகன் சிம்புவின் பிறந்த நாள் என்பதால் வரும் பிறந்த நாள் அவருக்கு இரட்டிப்பு மகிழ்ச்சியை தர வேண்டும் என்பதால் தயாரிப்பு தரப்பு இப்படியொரு ஏற்பாட்டை செய்திருக்கிறதாம். 

வானம் படத்தில் சிம்பு - யுவன் சங்கர் ராஜா இணைந்து பாடிய ஒரு பாடல் மட்டும் கொண்ட சி.டி., ஏற்கனவே வெளியிடப்பட்டு விட்ட நிலையில் மொத்த பாடல்களும் அடங்கிய சி.டி., ஜனவரியில் வெளியிடப்பட உள்ளது என்பது குறிப்பிடத்தக்கது