புத்தாண்டு கொண்டாட்டம்: பண்ணை வீடுகளில் குத்தாட்டம் போட்ட நடிகைகள்

கோவையின் புறநகர் பகுதிகளான செல்வபுரம், தொண்டாமுத்தூர், சூலூர், போத்தனூர் பகுதிகளில் எராமான பண்ணை வீடுகள் உள்ளது. இங்கு தொழில் அதிபர்களின் ஏற்பாட்டின் பேரில் புத்தாண்டு கொண்டாட்டம் சிறப்பாக நடந்தது.

மது விருந்துடன் சிக்கன், மட்டன் உணவு வகைகள் நள்ளிரவு வரை பரிமாறப்பட்டது. சில பண்ணை வீடுகளில் பிரமாண்ட மேடை அமைத்து சினிமா நடிகையை வரவழைத்து ஆடல், பாடல், கலை நிகழ்ச்சிகளை நடத்தினர். சிலர் துணை நடிகைகளை வரவழைத்து குத்தாட்ட நிகழ்ச்சிகளை நடத்தினர்.

இங்கு நூற்றுக்கணக்கான இளைஞர்கள் குவிந்து ஆடிபாடி உற்சாகமாக புத்தாண்டை கொண்டாடினர். ஒரு நிகழ்ச்சியில் அங்காடி தெரு படத்தின் கதாநாயகி நடிகை அஞ்சலி பங்கேற்று ரசிகர்களுடன் ஆடினார். தொடர்ந்து அங்குள்ள பண்ணை வீட்டில் தொழில் அதிபர்களுடன் விருந்து நிகழ்ச்சியில் பங்கேற்றார்.

அதே போல மற்றொரு பண்ணை வீட்டில் “சல்சா சங்கவி” என்ற பெயரில் நிகழ்ச்சி நடந்தது. இதில் நடிகை சங்கவி பங்கேற்று குத்தாட்டம் போட்டார். தொடர்ந்து ஏராளமான துணை நடிகை மற்றும் நடன கலைஞர்கள் இளைஞர்கள் உற்சாகப்படுத்தும் விதமாக நடன விருந்து படைத்தனர்.

நடிகைகளுடன் ஆடுவதற்காக இளைஞர்கள் போட்டி போட்டு மேடையேறினர். அனைத்து பண்ணை வீடுகளிலும் மது விருந்து அமர்க்களப்பட்டது. அளவுக்கு அதிகமாக மது அருந்தியவர்கள் பண்ணை வீடுகளிலேயே “பிளாட்” ஆகி விட்டனர்.

போதை தெளிந்தவர்கள் காரை எடுத்து செல்ல அறிவுறுத்தப்பட்டனர். கோவை மாநகர் மற்றும் புறநகர் பகுதிகளில் பாதுகாப்புக்கு 5 ஆயிரத்துக்கும் மேற்பட்ட போலீசார் பாதுகாப்பு பணியில் ஈடுபடுத்தப்பட்டனர். போலீசாரின் தீவிர கண்காணிப்பில் அசம்பாவித சம்பவங்கள் ஏதும் நிகழாமல் புத்தாண்டு கொண்டாட்டம் இனிமையானது.

சென்னையில்...
சென்னையில் இந்த முறை நடிகர் நடிகைகளே தனித் தனி பார்ட்டிக்கு ஏற்பாடு செய்திருந்தனர்.

விஜய் கொட்டிவாக்கத்தில் தந்த புத்தாண்டு பார்ட்டிக்கு நிறைய விவிஐபிக்கள் ஆஜர். அதேபோல, ரம்யாகிருஷ்ணன் தனது கிழக்கு கடற்கரைச் சாலை புதிய வீட்டில் கொடுத்த மிகப்பெரிய விருந்தில் த்ரிஷா, ஜெகபதிபாபு, சோனியா அகர்வால் என பலரும் கவர்ச்சியான உடையில் குவிந்தனர்.

மணிரத்னம் - சுஹாசினியும் புத்தாண்டு பார்ட்டி கொடுத்தனர். இங்கு மலையாள முன்னணி நடிகர் மோகன்லால் ஆஜராகியிருந்தார். அதேபோல ப்ரியதர்ஷன் - லிஸி கொடுத்த விருந்திலும் விஐபிக்களுக்குக் குறைவில்லை.

அஜீத் கொடுத்த 'மங்காத்தா விருந்து' அவரது வால்மீகி நகர் வீட்டில் அமர்க்களப்பட்டது. வெங்கட் பிரபு, பிரேம்ஜி, ஜெய் என அவர்களின் டீமே அங்கு புத்தாண்டை தங்கள் பாணியில் கொண்டாடியது.

மாமல்லபுரம் பண்ணை வீட்டில் நெருங்கிய நண்பர்களுக்கு விருந்து கொடுத்தனர் பிரகாஷ் ராஜ் - போனி வர்மா தம்பதிகள்