ஜெயலலிதா கூட்டத்தில் விஜயகாந்த் கலந்து கொள்ளாதது ஏன்? நடிகர் வடிவேலு

பழனிதொகுதி தி.மு.க வேட்பாளர் செந்தில்குமாரை ஆதரித்து நடிகர் வடிவேலு  பிரச்சாரம் செய்தார். அவர் பழனி பஸ் நிலையம் ரவுண்டானா அருகில் பேசும்போது,

’’தமிழக முதல்வர் கலைஞர் 6-வது முறையாக முதல் அமைச்சர் ஆகி விட்டார் என்பதை இந்த கூட்டம் காட்டுகிறது. இது வரலாறு காணாத கூட்டம்.

இது போன்ற கூட்டத்தை நான் பார்த்தது இல்லை. பழனி முருகன் கோவில் முன்பு நின்று பேசுவது எனக்கு பெருமையாக உள்ளது.

கலைஞர் கடந்த 5 ஆண்டுகளில் செய்த சாதனைகள் ஏராளம்.   தி.முக. ஆட்சியில் செய்த திட்டங்கள் அனைத்தும் உங்களுக்கு தெரியும். ஏழை -எளிய மக்களுக்காக அவர் திட்டங்களை வாரி வழங்கியுள்ளார்.

இப்போது கருப்பு எம்.ஜி. ஆர் என்று ஒருவர் கிளம்பி இருக்கிறார். எம்.ஜி.ஆர் என்பவர் ஒருவர் தான். கருப்பு, பச்சை, ரோஸ் என்று எம்.ஜி,ஆர் யாரும் கிடையாது.

கேப்டன் என்கிறார். அதற்கு அவருக்கு என்ன அருகதை உள்ளது. தொகுதி உடன்பாட்டுக்கு முன்பு மனரீதியான உடன்பாடு இருக்க வேண்டும். அது அவர்களுக்கு இல்லை. அ.தி.மு.க .கூட்டணியில் ஒரே மேடையில் தலைவர்கள் பேசினால் சரியான கூட்டணி என்று கூறி இருந்தேன். ஆனால் மேடையில் அவரை காணவில்லை.

தொண்டர்களையும் காணவில்லை. தலைவராக இருக்க அடிப்படை தகுதி வேண்டும்.

அ.தி.மு.க. -தே.மு.தி.க. கூட்டணி தண்ணீரும், எண்ணையும் கலந்த கூட்டணி. எண்ணையும், தண்ணீரும் சேருமா? அது சேராது. ஒருபஸ் நன்றாக ஓட வேண்டுமனால் 6 டயர்கள் வேண்டும். அங்கு 6 டயர்கள் நன்றாக இல்லை’’ என்று பேசினார்.