மிரட்டி பேசவைக்கிறார்கள் : விஜயகாந்த்

திருவாரூர் மாவட்டம் திருத்துறைப் பூண்டி தொகுதி இந்திய கம்யூனிஸ்டு கட்சி வேட்பாளர் உலகநாதனை ஆதரித்து திருத்துறைப்பூண்டியிலும், நாகை மாவட்டம் நாகூரில் நாகை அ.தி.மு.க.வேட்பாளர் ஜெயபால், கீழ்வேளூர் மார்க்சிஸ்ட் கம்யூனிஸ்டு கட்சி வேட்பாளர் மகாலிங்கம் ஆகியோரை ஆதரித்தும் தே.மு.தி.க. தலைவர் விஜயகாந்த் பேசினார். அப்போது அவர்,

’’அ.தி.மு.க. ஆட்சிக்கு வந்தால் கேபிள் டி.வி அரசுடைமையாக்கப்படும் என அ.தி.மு.க. பொது செயலாளர் ஜெயலலிதா அறிவித்தார். இதனால் தங்கள் வருமானம் போய் விடும் என்று என பயந்து கூட்டணியில் குழப்பத்தை விளைவிக்கும் வகையில் என்னைப்பற்றி தவறாக பிரச்சாரம் செய்கிறார்கள். அதைப்பற்றி நான் கவலைப்பட மாட்டேன்.

அ.தி.மு.க. வெற்றி பெற்று ஆட்சியை பிடிக்கும். உங்கள் தேவைகளை அ.தி.மு.க.பொதுசெயலாளர் ஜெயலலிதா நிச்சயம் நிறைவேற்றி தருவார்.

 ஏழைகளை அவர் ஏமாற்றி வருகிறார். தி.மு.க. மந்திரிகள் ஒவ்வொருவரும் 3 ஆயிரம் ஏக்கர் நிலம் வைத்துள்ளனர். கருணாநிதி ஏழைகளுக்கு 2 ஏக்கர் நிலம் தருவதாக கூறினார்.

ஆனால் செய்யவில்லை.   சோனியாகாந்தி இது சாதனைக்கு கிடைத்த வெற்றி என்று கூறி உள்ளார். இது சாதனைக்கு அல்ல சோதனைக்கு, வேதனைக்கு கிடைத்த வெற்றி.

விஜயகாந்துக்கு கெட்டப்பெயர் ஏற்படுத்த சதி செய்கிறார்கள்.   என்னைப்பற்றி தப்பு, தப்பாக பிரசாரம் செய்கிறார்கள். நடிகர், நடிகைகளை மிரட்டி அழைத்து வந்து பேசுகிறார்கள். அவர்களுக்கு பதில் சொல்ல வேண்டிய அவசியம் இல்லை. எது முக்கியம் என்று எனக்கு தெரியும். கலைஞர் மக்களுக்காக என்ன செய்தார். எனக்கு கூட்டம் வருவதை அவர்களால் பொருத்துக்கொள்ள முடியவில்லை.

எனக்கு கூட்டமே இல்லாததைப்போல அவர்கள் தொலைக்காட்சியில் செய்தி போடுகிறார்கள். அதை பற்றி நான் கவலைப்பட வில்லை. விஜயகாந்த் வாழ்ந்தார் என்றால் அது மக்களுக்காகத்தான்’’ என்று பேசினார்.