கருணாநிதியின் சாதனைகளை பட்டியலிட நேரமில்லை; சோனியா முன்னிலையில் ராமதாஸ் பேச்சு

சென்னை தீவுத்திடலில் நேற்று நடைபெற்ற தி.மு.க. கூட்டணி தேர்தல் பிரசார பொதுக்கூட்டத்தில் பாட்டாளி மக்கள் கட்சி நிறுவனர் டாக்டர் ராமதாஸ் பேசுகையில் கூறியதாவது:-

ஜனநாயக முற்போக்கு கூட்டணி ஒரு முற்போக்கு கூட்டணி. எதிரணியில் இருப்பது பிற்போக்கு கூட்டணி. 2001 முதல் 2006 வரை ஜெயலலிதா தான் முதல்-அமைச்சராக இருந்தார். அப்போது கான்கிரீட் வீடு தருவோம், கியாஸ் சிலிண்டர் தருவதாக வாக்குறுதி தந்தார். எதையும் தரவில்லை. ஆனால் முதல்-அமைச்சர் கருணாநிதி செய்த சாதனைகளை பட்டியலிட நேரமில்லை.

மத்திய அரசோடு மாநில அரசுக்கு ஒரு நல்லிணக்கம் தேவை. ஜெயலலிதா முதல்வராக இருந்தபோது பிரதமர் நரசிம்மராவை தலைமுறை இடைவெளி என்றார். அத்வானிக்கு ஞாபக மறதி நோய் இருப்பதாக கூறினார். வாஜ்பாய் செயலற்ற பிரதமர் என்றார். மன்மோகன்சிங்கை பலஹீனமான கால்களை கொண்டவர் என்றார். வாஜ்பாயுடன் மோதும் போக்கை கடைபிடிக்காமல் இருந்திருந்தால் காவிரி பிரச்சினை தீர்ந்திருக்கும்.

கருணாநிதி தலைமையிலான அரசு மத்திய அரசுடன் இணக்கமான அரசாக இருந்ததால் தான் செம்மொழி அந்தஸ்து கிடைத்தது. சேது சமுத்திர திட்டம் தொடங்கப்பட்டது. நெடுஞ்சாலை திட்டம் விரைவாக செயல்படுத்தப்பட்டது.   தேர்தல் ஆணையம் ஒருதலைபட்சமாக நடந்து வருகிறது.

கலெக்டர் சகாயத்தின் அத்துமீறல்கள் ஏராளம். அ.தி.மு.க. ஆட்சிக்கு வந்தால் தமிழ்நாடு வீழ்ச்சி அடையும். ஜெயலலிதாவுக்கு எதிர்க்கட்சியாக இருப்பதற்கு கூட தகுதியில்லை. சட்டசபையில் நாங்கள் செய்ததில் நூறில் ஒரு பங்கு கூட அ.தி.மு.க. செய்யவில்லை. அவர் வரப்போவதில்லை, சில ஊடகங்கள் தான் வேண்டுமென்றே பொய்யான பரப்புரை செய்து வருகிறது.

ஜனநாயக முற்போக்கு கூட்டணியை ஆதரிக்க தவறினால் தமிழகம் இருண்ட தமிழகமாக மாறிவிடும் என்பது மக்களுக்கு தெரியும். 234 தொகுதிகளிலும் நாம் வெற்றி பெற வேண்டும். கருணாநிதி 6-வது முறையாக முதல்-அமைச்சராக வரவேண்டும்.

இவ்வாறு டாக்டர் ராமதாஸ் கூறினார்.

விடுதலை சிறுத்தைகள் தலைவர் திருமாவளவன் பேசியதாவது:-

6-வது முறையாக கருணாநிதி முதல்-அமைச்சராக வேண்டும் என்பது தான் நமது அனைவரின் நோக்கம். யார் எம்.எல்.ஏ.வாக ஆவது என்பதைவிட யார் முதல்-அமைச்சர் ஆவது என்று தான் வாக்காளர்கள் சிந்திக்க வேண்டும். கருணாநிதியை எதிர்ப்பவர்கள் எத்தகைய தகுதிகளை பெற்றிருக்கிறார்கள் என்று வாக்காளர்கள் எண்ணிப்பார்க்க வேண்டும்.

எந்த திட்டமும், எந்த கொள்கையும் இல்லாதவர் முதல்-அமைச்சர் ஆக வேண்டுமா? அனுபவம் வாய்ந்த, சாதனைகள் நிகழ்த்தியவர் முதல்-அமைச்சர் ஆக வேண்டுமா? 10 ஆண்டுகள் முதல்-அமைச்சராக இருந்த ஜெயலலிதா சாதித்தது என்ன? முதல் 5 ஆண்டுகளில் வளர்ப்பு மகன் திருமணத்தை நடத்தினார். அடுத்த 5 ஆண்டுகள் வேண்டாத தலைவர்களை எல்லாம் கைது செய்தார்.

இதுதான் அவர் செய்த சாதனை. 19 ஆண்டுகள் தமிழ்நாட்டை முதல்-அமைச்சர் கருணாநிதி ஆண்டிருக்கிறார். அவரது திட்டங்களை, சாதனைகளை அடுக்க நேரமில்லை. நாங்கள் சாதனைகளை சொல்லி ஓட்டு கேட்கிறோம். ஆனால் கருணாநிதியை விமர்சிப்பதை மட்டுமே கொள்கையாக கொண்ட, கொள்கையே இல்லாத ஒரு கூட்டணியாக அ.தி.மு.க. கூட்டணி திகழ்கிறது.எந்த அணி வேண்டும் என்று சிந்தித்து பார்த்து வாக்களியுங்கள். சோனியா காந்தி வாழ்த்துக்களோடு இந்த அணி வெற்றி பெறட்டும்.

இவ்வாறு திருமாவளவன் பேசினார்.

கொங்கு நாடு முன்னேற்ற கழக தலைவர் பெஸ்ட் ராமசாமி பேசும்போது, "இந்த கூட்டணியை பார்த்தாலே வெற்றி பெறுவதற்கான அருமையான கூட்டணியாக இருக்கிறது. பிற்படுத்தப்பட்டவர்கள், மிக பிற்படுத்தப்பட்டவர்கள், தாழ்த்தப்பட்டவர்கள், சிறுபான்மையோர் என எல்லா கட்சிகளுக்கும் பிரதிநிதித்துவம் கொடுத்து அமைக்கப்பட்டுள்ளது.

தி.மு.க. தேர்தல் அறிக்கையில் கூறியிருப்பதை வைத்தே இந்த கூட்டணி வெற்றி பெற்று, கருணாநிதி மீண்டும் முதல்-அமைச்சர் ஆவார். இதில் எந்த சந்தேகமும் இல்லை'' என்றார். இந்திய யூïனியன் முஸ்லிம் லீக் தலைவர் காதர் மொய்தீன் பேசும்போது, "5 ஆண்டு தி.மு.க. ஆட்சியில் சொன்னதை செய்ததையும், சொல்லாததை செய்ததையும் அங்கீகரிக்கிற வகையில் நீங்கள் வாக்களிக்க வேண்டும்.

மாநிலத்திலும், மத்தியிலும் சிறந்து விளங்க வேண்டும் என்றால் இந்த கூட்டணி சிறந்து விளங்க வேண்டும், வெற்றிபெற வேண்டும்'' என்றார்.   தலைமை தாங்கிய தங்கபாலு பேசும்போது, "கடந்த ஆண்டுகளில் சோனியா காந்தியும், கருணாநிதியும் இணைந்து பேசிய பொதுக்கூட்டங்களுக்கு பிறகு தொடர்ந்து வெற்றியை பெற்று வந்திருக்கிறோம். அந்த சாதனை இந்த ஆண்டும் தொடரும்.

கருணாநிதி 6-வது முறையாக முதல்-அமைச்சராக வேண்டும் என்று கோரிக்கை வைப்பதற்காகவே சோனியா காந்தி இன்று இங்கு வந்திருக்கிறார். மத்திய மாநில அரசுகளின் சாதனைகளுக்கு நீங்கள் வாக்களிக்க வேண்டும்'' என்றார்.

இந்த கூட்டத்தில் தமிழக காங்கிரஸ் பொறுப்பாளர் மத்திய மந்திரி குலாம்நபி ஆசாத், காங்கிரஸ் செயலாளர் நாயக், எம்.ஜி.ஆர். கழக தலைவர் ஆர்.எம்.வீரப்பன், பெருந்தலைவர் மக்கள் கட்சி அமைப்பாளர் என்.ஆர்.தனபாலன், கூட்டணி கட்சிகளின் தலைவர்கள் பசீர் அகமது, லியாகத் அலிகான், வலசை ரவிச்சந்திரன், பொன்.குமார் உள்பட பலர் கலந்து கொண்டனர். சோனியா காந்தி இரவு 7 மணிக்கு பேசி முடித்து விட்டு, சென்னை மற்றும் சுற்றுப்புற பகுதிகளை சேர்ந்த கூட்டணி கட்சிகளின் வேட்பாளர்களை அறிமுகம் செய்து வைத்தார். பின்னர் கார் மூலம் விமான நிலையத்திற்கு புறப்பட்டு சென்றார்.