என் உயிருக்கு ஆபத்து ஏற்பட்டால் தேர்தல் ஆணையம் தான் பொறுப்பு : வடிவேலு

தி.மு.க. மற்றும் அதன் கூட்டணி கட்சி வேட்பாளர்களை ஆதரித்து நடிகர் வடிவேலு தமிழ்நாடு முழுவதும் பிரசாரம் செய்து வருகிறார். கடந்த 2 நாட்களாக மதுரை, சிவகங்கை மாவட்டங்களில் தீவிர பிரசாரம் செய்து வருகிறார்.

பிரசாரத்தின் போது விஜயகாந்தை தாக்கி பேசி வருகிறார். இந்த நிலையில் முதுகுளத்தூரில் அவர் வேனில் பேசி கொண்டு இருந்தபோது திடீர் என வேன் மீது கல்வீசப்பட்டது. இதேபோல சிவகங்கையில் பேசிக் கொண்டு இருந்த போதும் கல்வீசப்பட்டது. மதுரை மாவட்டம் அலங்காநல்லூருக்கு பிரசாரம் செய்ய சென்றார். அப்போது ஊருக்குள் நுழையும் இடத்தில் யாரோ மர்ம ஆசாமிகள் நடிகர் வடிவேல் சென்ற வேனில் சரமாரியாக கல்வீசி தாக்கி விட்டு ஓடிவிட்டனர்.

இதனால் வேனில் உள்ள கண்ணாடிகள் உடைந்தது. ஆனால் யாருக்கும் காயம் இல்லை. இந்த சம்பவம் குறித்து நடிகர் வடிவேல் கூறும்போது, நான் பிரசாரம் செய்ய வருவதை அறிந்து யாரோ சிலர் இருட்டில் இருந்து கல்வீசி தாக்கினர். நான் பிரசாரம் செய்யும் இடங்களில் போதிய போலீஸ் பாதுகாப்பு கூட இல்லை. பேருக்காக 4 போலீசார் மட்டும் வந்து செல்கிறார்கள். எனவே என் உயிருக்கு ஆபத்து ஏற்பட்டால் தேர்தல் ஆணையம் தான் பொறுப்பு ஏற்க வேண்டும் என்றார்.