மரியாதை கொடுக்க தெரியாதவர் ஜெ.: திருமா

கூட்டணி கட்சியினருக்கு மரியாதை தரத்தெரியாதவர் ஜெயலலிதா என, திருமாவளவன் பேசினார்.

காரைக்காலில் தி.மு.க. காங்கிரஸ் கூட்டணி வேட்பாளர்களை ஆதரித்து பேசிய திருமாவளவன்,

புதுச்சேரியில் காங்கிரஸ் ஒருவருக்கொருவர் விட்டுக்கொடுத்து உருவான கூட்டணி. வலிமையான கூட்டணி. தமிழகம் மற்றும் புதுச்சேரியில் இந்த கூட்டணி வலுவாக உள்ளது. இந்த கூட்டணி நிச்சயம் வெற்றி பெறும். எனது உயிருக்கும் உயிரான விடுதலை சிறுத்தைகள் கட்சித் தொண்டர்களுக்கு ஒரு வேண்டுகோள் விடுப்பதற்காகத்தான் இன்று தமிழகத்திலிருந்து இங்கு வந்துள்ளேன்.

இன்னும் 5 6 நாட்கள்தான் உள்ளன. விடுதலை சிறுத்தைகள் அனைவரும் நமது கூட்டணி வெற்றிக்காக அரும்பாடுபட வேண்டும். விடுதலை சிறுத்தைகளின் ஒரு ஓட்டுக்கூட மாறக் கூடாது. காங்கிரஸ் தி.மு.க கூட்டணியில் விடுதலை சிறுத்தைகளுக்கு தமிழகத்தில் 10 தொகுதிகள் தரப்பட்டுள்ளது.

அந்த 10 தொகுதிகளிலும் விடுதலை சிறுத்தைகள் வெற்றி பெற காங்கிரஸ், தி.மு.க. பா.ம.க தொண்டர்கள் உழைக்கிறார்கள். எனவே தமிழகத்தில் 10க்கு 10 தொகுதிகளிலும் விடுதலை சிறுத்தைகள் வெற்றி பெறுவது உறுதி. அதுபோன்று புதுச்சேரியில் ஒதுக்கப்பட்ட ஒரு தொகுதியிலும் நாம் வெற்றி பெற வேண்டும்.

காங்கிரஸ் கட்சியில் பல்வேறு பதவிகளையும், சுகங்களையும் அனுபவித்து விட்டு ரங்கசாமி தனிக்கட்சி தொடங்கியுள்ளார். அவர் ஜெயலலிதாவுடன் கூட்டணி அமைப்பதற்காக பேசிப் பேசி பார்த்தார். ஆனால் அந்த அம்மா தன்னிச்சையாக புதுச்சேரியில் தனது கட்சி வேட்பாளர்களை அறிவித்தார். கூட்டணி கட்சியினருக்கு மரியாதை தரத்தெரியாதவர் அவர். வைகோ கதி என்ன ஆனது? அவர்களது கூட்டணிக்குள்ளே வலு இல்லை. ஆனால் காங்கிரஸ், தி.மு.க, பா.ம.க, விடுதலை சிறுத்தைகள் கூட்டணி வலிமையான கூட்டணி. வெற்றிக் கூட்டணி. தன்மானக் கூட்டணி. இவ்வாறு தொல்.திருமாவளவன் பேசினார்.