அம்மாவிற்காக பிரசாரம் செய்ய முடியவில்லையே: வருத்தத்தில் பிரபல நடிகர்

மதுரையில் சில மாதங்களுக்கு முன்னர் நடந்த விபத்தில் படுகாயம் அடைந்த நடிகர் ராமராஜன் தற்போது காயத்தில் இருந்து மீண்டு குணமாகி வருகிறார். இதனிடையே நடைபெற இருக்கின்ற சட்டமன்ற தேர்தலில் அம்மா ஜெயலலிதாவிற்கு ஆதரவாக பிரசாரம் செய்ய முடியவில்லை என்ற வருத்தத்தில் இருக்கிறார்.

எங்க ஊரு பாட்டுக்காரன், கரகாட்டக்காரன் உள்ளிட்ட பல்வேறு படங்களில் நடித்திருக்கும் நடிகர் ராமராஜன், சினிமாவில் வாய்ப்பு குறைந்த பின்னர் அ.தி.மு.க., கட்சியில் சேர்ந்து எம்.பி., ஆனார். பின்னர் அவ்வப்போது ஒருசில படங்களில் தலைகாட்டி வந்த ராமராஜன் முழுநேர அரசியல்வாதியாக மாறி அ.தி.மு.க.,விற்கு ஆதரவாக பிராசரம் செய்து வந்தார். கடந்த சில மாதங்களுக்கு முன்னர் கூட்டம் ஒன்றில் பங்கேற்று விட்டு தனது காரில் சென்னை நோக்கி பயணித்தபோது, மதுரை அருகே விபத்துக்குள்ளானது. இதில் படுகாயம் அடைந்த ராமராஜன், மதுரையில் உள்ள தனியார் மருத்துவமனையில் சிகிச்சை பெற்று வந்தார். காயத்தில் இருந்து மீண்டு குணமாகி வரும் ராமராஜன் மருத்துவமனையில் இருந்து வீட்டிற்கு டிஸ்சார்ஜ் ஆகியுள்ளார். இதனிடையே தேர்தலில் அம்மாவிற்காக பிரசாரம் செய்ய முடியவில்லை என்று வருத்தப்படுகிறார் ராமராஜன்.

இதுகுறித்து அவர் கூறியதாவது, நடைபெற இருக்கின்ற சட்டமன்ற தேர்தலில் எனக்கு சீட் தருவதாக அம்மா சொல்லி இருந்தார். ஆனால் எனது துரதர்ஷடம் மதுரையில் நடந்த விபத்தில் எனக்கு பலத்த காயம் ஏற்பட்டது. தற்‌போது காயம் நன்றாக குணமாகி வருகிறது. காயங்கள் முழுமையாக குணமாகும் வரை நன்றாக ஒய்வெடுக்க டாக்டர்கள் அறிவுறுத்தியுள்ளனர். தேர்தலில் தான் நிற்க முடியவில்லை, அம்மாவிற்காக பிரசாரம் செய்யலாம் என்று நினைத்தால் அதுவும் முடியாமல் போனது மிகுந்த வருத்தத்தை அளிக்கிறது. நான் பிரசாரம் செய்யாவிட்டாலும், நிச்சயமாக அம்மா தான் அடுத்த முதல்வராக வருவார் என்றார். அத்துடன் நான் நடித்து கொண்டு இருக்கும் மேதை படம் முடியும் தருவாயில் இருக்கிறது. விரைவில் இப்படம் திரைக்கு வர இருக்கிறது என்றும் கூறினார்.