புதிய மருத்துவ காப்பீட்டு திட்டத்தை ஜெயலலிதா தொடங்கி வைத்தார்

முதல்-அமைச்சர் ஜெயலலிதா அளித்த தேர்தல் வாக்குறுதியின்படி புதிய மருத்துவ காப்பீட்டு திட்டம் அறிவிக்கப்பட்டுள்ளது. 

முதல்-அமைச்சரின் விரிவான மருத்துவ காப்பீட்டுத் திட்டம் என்ற பெயரில் உருவாக்கப்பட்டுள்ள இந்த புதிய மருத்துவக் காப்பீட்டுத் திட்டத்தின் மூலம் ஏழை-எளிய மக்கள் அதிக அளவில் மருத்துவ பயன்பெற முடியும்.

முந்தைய அரசு செயல்படுத்திய திட்டத்தில் இருந்த குறைகள் இதில் நீக்கப்பட்டுள்ளன. இந்த திட்டத்தில் மருத்துவ சிகிச்சை முறைகள் அதிகரிக்கப்பட்டுள்ளது. மருத்துவ பராமரிப்பும் அனுமதிக்கப்பட்டுள்ளது.

குழந்தை பிறப்புக்கு பிறகு தேவைப்படும் சிகிச்சைகளும், இதில் சேர்க்கப்பட்டுள்ளன. ஒருசில நோய்களுக்கான காப்பீட்டு வரம்பு 1 1/2 லட்சம் ரூபாயாக அதிகரிக்கப்பட்டுள்ளது.   இந்த புதிய காப்பீட்டு திட்டத்தின்படி ஒரு குடும்பம் சிகிச்சைக்காக ஆண்டுக்கு 1 லட்சம் வீதம் 4 வருடங்களுக்கு ரூ.4 லட்சம் பெறமுடியும் என்பது சிறப்பு அம்சமாகும்.

புதிய திட்டத்தின் மூலம் பச்சிளம் குழந்தைகளுக்கான சிகிச்சை உள்பட 1,016 சிகிச்சைகளுக்கு காப்பீட்டு தொகை பெறமுடியும். 113 தொடர் சிகிச்சை, 23 நோய் கண்டறிதல்முறை ஆகியவையும் இதில் சேர்க்கப்பட்டுள்ளது.

சிகிச்சை சம்பந்தப்பட்ட பரிசோதனைகளும், அறுவை சிகிச்சை தேவைப்படாதபோதும் மருத்துவ காப்பீட்டு தொகை பெறலாம். நோயாளிகள் சிகிச்சைக்காக மருத்துவமனையில் அனுமதிக்கப்படுவதற்கு முந்தைய நாள், மருத்துவ சிகிச்சை முடிந்து வீடு திரும்பிய நாளில் இருந்து 5 நாட்கள் செய்யப்படும் பரிசோதனை கட்டணம் இந்த செலவு தொகை ஆகியவற்றையும் இந்த திட்டத்தின் மூலம் பெறமுடியும்.

பச்சிளம் குழந்தைகள் முதல் குடும்பத்தில் உள்ள அனைத்து வயதினரும் பயன் பெறலாம். மொத்தம் 1 கோடியே 34 லட்சம் குடும்பங்கள் இந்த திட்டத்தில் பயன் பெறும் வகையில் உருவாக்கப்பட்டுள்ள புதிய காப்பீட்டு திட்ட பயனாளிகளுக்கு புதிய மருத்துவ காப்பீட்டு அட்டை வழங்கப்படும்.

இதன்மூலம் தமிழ்நாடு முழுவதும் உள்ள அங்கீகரிக்கப்பட்ட தனியார் மற்றும் அரசு மருத்துவமனைகளில் கட்டணம் இல்லாமல் சிகிச்சை பெறலாம். 

புதிய மருத்துவ காப்பீட்டு திட்டமான முதல்- அமைச்சரின் விரிவான மருத்துவ காப்பீட்டு திட்டம் தொடக்க விழா இன்று சென்னை கோட்டையில் பிற்பகல் 2 மணி அளவில் நடந்தது.

முதல்-அமைச்சர் ஜெயலலிதா இதில் கலந்து கொண்டு புதிய மருத்துவ காப்பீட்டு திட்டத்தை தொடங்கி வைத்தார். விழாவில் அமைச்சர்கள், அதிகாரிகள் கலந்து கொண்டனர்.