சட்டமன்ற தேர்தலில் ரஜினி ஆதரவை பெற அரசியல் கட்சிகள் வரிந்து கட்டின. ரசிகர்களும் அவரது அறிவிப்பை எதிர் பார்த்தனர். ஆனால் வழக்கம் போலவே மவுனமாக இருந்து விட்டார். எந்த கட்சியையும் ஆதரிக்காமல் நடுநிலை வகிப்பதென முடிவு செய்துள்ளார். இந்த விஷயம் அனைத்து மாவட்ட ரசிகர் மன்ற நிர்வாகிகளுக்கும் தெரிவிக்கப்பட்டு உள்ளது.
ரஜினி உருவப்படங்கள், மன்ற கொடிகளை தேர்தலில் ரசிகர்கள் பயன்படுத்தக் கூடாது என்றும் அறிவுறுத்தப்பட்டு உள்ளது. ரஜினியை அவரது வீட்டில் துணை முதல்வர் மு.க.ஸ்டாலின் சந்தித்தார். இதுபோல் சேப்பாக்கம் தொகுதி தி.மு.க. வேட்பாளர் ஜெ.அன்பழகன், ஆயிரம்விளக்கு தி.மு.க. வேட்பாளர் ஜின்னா, கொளத்தூர் தொகுதி அ.தி.மு.க. வேட்பாளர் சைதை துரைசாமி, ஆயிரம்விளக்கு தொகுதி பாரதீய ஜனதா வேட்பாளர் சிவலிங்கம் ஆகியோரும் ரஜினியை சந்தித்தனர். எல்லோருக்கும் வாழ்த்து தெரிவித்தார்.
வருகிற 13-ந்தேதி ஓட்டுப்பதிவின்போது ஆயிரம் விளக்கு தொகுதியில் உள்ள ஸ்டெல்லா மேரீஸ் கல்லூரி வாக்குசாவடியில் தனது வாக்கை பதிவு செய்கிறார். ஒவ்வொரு தேர்தலிலும் ரஜினி ஓட்டுப் போட தவறுவதில்லை என்பது குறிப்பிடத்தக்கது.
தேர்தலில் தனது ஜனநாயக கடமையை தவறாமல் நிறைவேற்றி வருகிறார். ஓட்டுப் போட்ட பின் உடனடியாக “ராணா” படப்பிடிப்புக்கு புறப்பட்டு செல்கிறார். ஏ.வி.எம். ஸ்டூடியோவில் இப்படத்துக்கு “செட்” போடப்பட்டு உள்ளது. அங்கு சில காட்சிகளில் நடிக்கிறார். அதன்பிறகு படக்குழுவினர் லண்டன் புறப்பட்டு செல்கின்றனர். 1996 சட்டமன்ற தேர்தலில் தி.மு.க., த.மா.கா. கூட்டணியை ரஜினி வெளிப்படையாக ஆதரித்தார்.
2004 பாராளு மன்ற தேர்தலில் பாரதீய ஜனதாவுக்கு ஓட்டுப் போடுவதாக அறிவித்தார். அதன் பிறகு நடந்த தேர்தல்களில் எந்த கட்சிக்கும் அவர் வெளிப்படையாக ஆதரவு தெரிவிக்கவில்லை.
No comments:
Post a Comment