விஜயகாந்த்துக்கு ஓட்டு சதவீதம் குறையும்: பாஜக

இந்த தேர்தலில் விஜயகாந்த் மீது மக்களுக்கு நம்பிக்கையில்லா நிலை ஏற்பட்டுள்ளது. அதனால், விஜயகாந்த் கட்சிக்கு ஓட்டு சதவீதம் குறைந்து விடும் என, பாஜக மூத்த தலைவர் இல.கணேசன் கூறியுள்ளார்.

சிதம்பரம் தொகுதி, பா.ஜ., வேட்பாளர் கண்ணனை ஆதரித்து பாஜக மூத்த தலைவர் இல.கணேசன் பிரச்சாரம் மேற்கொண்டார். அப்போது செய்தியாளர்களிடம் பேசிய அவர்,

அரசியல் கட்சிகள் கொள்கைகளை தனித்தனியாக கூறி ஓட்டு கேட்ட நிலை, 1967ம் ஆண்டு வரை இருந்து வந்தது. கூட்டணி அமைத்து கட்சிகள் போட்டியிடுகிற நிலை வந்த பிறகு, கூட்டணி வெற்றிக்காக ஒற்றுமையாக ஓட்டு சேகரித்தனர். ஆனால், இந்த தேர்தலில் கூட்டணியிலும் ஒற்றுமையில்லை; கூட்டணியில் உள்ள கட்சிகளுக்குள்ளேயும் ஒற்றுமையில்லை.

கூட்டணி கட்சி தலைவர்களாவது ஒற்றுமையாக இருக்கின்றனரா என்றால், அதுவும் சந்தேகம் தான். இவை எல்லாவற்றையும் தாண்டி, காங்கிரஸ் வேட்பாளரை, அவரது கட்சியின‌ரே எதிர்க்கும் நிலை உள்ளது. இவற்றுக்கு மத்தியில், மக்களின் ஆதரவு பா.ஜ., கட்சிக்கு கிடைக்கும் என்பதால் வெற்றியும், ஓட்டும் கணிசமாக இருக்கும். 10 இடங்களுக்கு மேல் பா.ஜ., வெற்றி பெறும். ஏனைய தொகுதிகளில் பிரதான கட்சிகளின் வெற்றியை நிர்ணயிப்பதாக அமையும்.தேர்தல் கமிஷன் விதிமுறைகள் கடுமையாக கடைபிடிக்கப்படுவதை பா.ஜ., வரவேற்கிறது.

தேர்தல் நெருங்க, நெருங்க மக்கள் தைரியமாக வந்து ஓட்டளிக்கவும், ஓட்டு சதவீதம் கூடவும், முறைகேடுகள் நடப்பதை தடுக்கவும், கூடுதல் கெடுபிடிகளை கடைபிடிக்க வேண்டும்.தேர்தல் கமிஷன் கெடுபிடியால், திருமங்கலம் பார்முலாவை பயன்படுத்த முடியாமல் தவிக்கின்றனர்.

தி.மு.க., அ.தி.மு.க.,விற்கு மாற்றாக இருப்பேன், முதல்வராவேன் என்றார் விஜயகாந்த். எம்.ஜி.ஆர்., போல் ஏதோ மாற்றத்தை ஏற்படுத்தப் போகிறார் என மக்கள் நம்பினர். அதனால், கடந்த தேர்தலில் கணிசமான ஓட்டு கிடைத்தது. இந்த தேர்தலில் அவர் மீது மக்களுக்கு நம்பிக்கையில்லா நிலை ஏற்பட்டுள்ளது. அதனால், ஓட்டு சதவீதம் குறைந்து விடும். அந்த ஓட்டுகள் பா.ஜ.,வுக்கு சாதகமாக அமையும் என்றார்.