விஜயகாந்த் படத்தில் மட்டுமே முதல்-அமைச்சராக முடியும்; வடிவேலு கிண்டல்

நடிகர் வடிவேலு திருச்சி மாவட்டத்தில் தி.மு.க. கூட்டணி கட்சி வேட்பாளர்களை ஆதரித்து பிரசாரம் செய்தார். திருச்சி மேற்கு தொகுதியில் போட்டியிடும் அமைச்சர் கே.என். நேரு, திருச்சி கிழக்கு தொகுதி வேட்பாளர் அன்பில் பெரியசாமி, மற்றும் கூட்டணி கட்சி வேட் பாளர்களை ஆதரித்து பிரசாரம் செய்தார். அப்போது அவர் பேசியதாவது:-

தமிழக முதல்-அமைச்சர் கருணாநிதி பல திட்டங்களை நிறைவேற்றி மக்களை மகிழ்ச்சியாக வைத்துள்ளார். கலைஞரின் திட்டங்களை ஐ.நா.சபை கூட பாராட்டி உள்ளது. ஆனால் ஒருதருதலை தன்னை கருப்பு எம்.ஜி.ஆர். என்று கூறிக் கொண்டு முதல்-அமைச்சர் ஆவேன்னு சொன்னார். நடிக்க வழியில்லை என்றால் ஜவுளிக்கடை வைத்து பிழைக்க வேண்டியதுதானே.

அதை விட்டு விட்டு நான் முதல்-அமைச்சர்னு சொல்லிக்கிட்டு ஏன் அரசியலுக்கு வந்த?. விஜயகாந்த் முதல்-அமைச்சர் ஆகனும்னா சினிமாவில் மட்டும் தான் ஆக முடியும். முதல்-அமைச்சராக நடித்து படத்தை தயாரித்து அவர் மனைவி, மச்சினன், கொளுந்தியாளுடன் படத்தை போட்டு பார்த்துக் கொள்ள வேண்டியதுதானே.

கருப்பு எம்.ஜி.ஆர். என்று கூறிக் கொண்டு சுற்றுபவர்களை எம்.ஜி.ஆரின் உண்மையான தொண்டர்கள் எதிர்க்க வேண்டும். தி.மு.க. கூட்டணி நிதான கூட்டணி, தெளிவான கூட்டணி, கலைஞர் தேர்தல் அறிக்கையில் கூறியுள்ள திட்டங்கள் பொதுமக்களுக்கு வரும். ஆனால் எதிர்க்கட்சிகாரர்கள் தேர்தல் அறிக்கையில் கூறியுள்ள திட்டங்கள் வரும்... ஆனா... வராது.

இவ்வாறு வடிவேலு பேசினார்.