ராகுல் முன்னிலையில் "தங்கபாலு டவுன் டவுன்'

ராகுல் முன்னிலையில், தங்கபாலு பேச வந்த போது, தொண்டர்கள் "தங்கபாலு டவுன், டவுன்' என, கூச்சலிட்டதால், அவர் பேசாமலயே சென்று விட்டார். ஈரோடு வேளாளர் மகளிர் கல்லூரி மைதானத்தில் நேற்று காங்கிரஸ் - தி.மு.க., கூட்டணி தேர்தல் பிரச்சார பொதுக்கூட்டம் நடந்தது. காங்கிரஸ் பொதுச்செயலாளர் ராகுல் பேசுவதற்கு முன்பாக, முன்னாள் மத்திய அமைச்சர் இளங்கோவன் பேசினார். அவரைத் தொடர்ந்து காங்கிரஸ் மாநிலத் தலைவர் தங்கபாலு மைக் அருகே வந்து, "பெரியோர்களே' என, பேச ஆரம்பித்தார். அதற்குள் மேடைக்கு முன் அமர்ந்திருந்த காங்கிரஸ் தொண்டர்கள், "தங்கபாலு டவுன், டவுன்' என, தொடர்ந்து கூச்சலிட்டனர். "அப்செட்' ஆன, தங்கபாலு, மேற்கொண்டு எதுவும் பேசாமல், "தி.மு.க.,வுக்கு உதயசூரியன் சின்னத்திலும், காங்கிரஸூக்கு கை சின்னத்திலும், பா.ம.க.,வுக்கு மாம்பழம் சின்னத்திலும், கொ.மு.க.,வுக்கு சிலிண்டர் சின்னத்திலும் வாக்களிக்க வேண்டுகிறேன்' என, கூறிவிட்டு வேகவேகமாக தனது இருக்கைக்கு வந்து கடுப்புடன் உட்கார்ந்தார்.