தேர்தலுக்கு பிறகு அதிமுகவுடன் காங். கூட்டணி :இல. கணேசன்

உளுந்தூர்பேட்டை தொகுதி பாஜக வேட்பாளர் அன்பு அருளை ஆதரித்து உளுந்தூர்பேட்டை பஸ் நிலையத்தில் பா.ஜ.க. மூத்த தலைவர் இல.கணேசன் பேசினார்.

 அவர்,  ‘’தமிழ்நாட்டில் திமுக-அதிமுக ஆகிய கட்சிகளிடையே நடக்க வேண்டிய யுத்தம் திசைமாறி தேர்தல் ஆணையத்துக்கும், திமுகவுக்குமிடையே நடைபெற்று வருகிறது.

தேர்தல் ஆணையத்தின் செயல்பாடுகள் மக்களிடையே திருப்திகரமாக உள்ளது.

அதை நாங்கள் வரவேற்கிறோம்.  ஆனால் திமுக தலைவர் கருணாநிதி, விடுதலைச் சிறுத்தைகள் கட்சி தலைவர் திருமாவளவன் ஆகியோர் தேர்தல் ஆணையத்தின் செயல்பாடுகளை தவறாக விமர்சனம் செய்து வருகின்றனர்.

 அதேபோல் மத்திய,மாநில ஆட்சியில் உள்ளவர்கள்தான் இதை கண்டிக்கின்றனர். ஏனைய கட்சியினர் வரவேற்கின்றனர்.

 இப்படி பேசுவதால் அதிமுகவுக்கு ஆதரவாக பேசுவதாக நினைத்துக் கொள்ள வேண்டாம். அதிமுகவும் 2006-ல் நடைபெற்ற தேர்தலில் தேர்தல் ஆணையத்தை எதிர்த்து கண்டன ஆர்ப்பாட்டம், போராட்டம் நடத்திய கட்சிதான்.

மேல் மட்டத்திலிருந்து, கீழ் மட்டத்திற்கு பணம் கட்டுக்கட்டாக சாக்கு மூட்டைகளில் திணித்து வருகிறது. இந்த பணம் எல்லாம் புதர்களிலும், சுடுகாட்டிலும் பதுக்கி வைத்திருக்கிறார்கள்.

 தேர்தல் ஆணையத்தின் இந்த நடவடிக்கையால் தலைவர்கள் வருத்தப்படுகிறார்கள், இதை மக்கள் வரவேற்கிறார்கள்’’ என்றார்.

அவர் மேலும்,  ‘’தேர்தல் முடிந்த பிறகு அதிமுக-காங்கிரஸ் கூட்டணி அமையாது என மத்திய உள்துறை அமைச்சர் ப.சிதம்பரத்தால் உத்தரவாதம் அளிக்க முடியுமா?’’ என கேள்வி எழுப்பினார்.