வேட்பாளர் விஜயகாந்த்தை அடிக்க வேண்டும்: வடிவேலு

தேனி மாவட்டம் பெரியகுளம் தொகுதியில் தி.மு.க சார்பில் போட்டியிடும் வேட்பாளர் அன்பழகனை ஆதரித்து தேனி நேரு சிலை அருகில் நடிகர் வடிவேலு பிரசாரம் செய்தார். அப்போது அவர் பேசியதாவது: கலைஞர் 6 வது முறையாக முதல்வராவது உறுதியாகி உள்ளது. சாதாரண ஏழையான நான் ஏழையின் கஷ்டம் அறிந்ததால் கருணாநிதியின் ஆட்சி நீடிக்க வேண்டும் என்பதற்காக பிரசாரம் செய்ய வந்திருக்கிறேன்.

இலவசங்களை கொடுப்பதை குறைகூறியவர்கள் இன்றைக்கு இலவசங்களை அறிவித்துள்ளனர். ஓட்டுரிமை உள்ளவர்களுக்கு மட்டும் இல்லாமல் கருவில் குடியிருக்கும் சிசுவுக்கும் மாதம் ரூ.ஆயிரம் வீதம் தருபவர் கருணாநிதி. 108 ஆம்புலன்ஸ், மற்றும் கலைஞர் காப்பீடு திட்டத்தால் ஆயிரக்கணக்கானோர் உயிர் பிழைத்திருப்பர். கருவறை முதல் கல்லறை வரை கருணாநிதியின் திட்டங்கள் சென்று சாதனை படைத்துள்ளது.

இத்தனை திட்டங்களை தந்த கலைஞருக்கு இருந்து உதவியை பெற்றுக் கொண்டு ஓட்டுக்களை மட்டும் எதிர்தரப்பினருக்கு போட வேண்டுமாம். தமிழக மக்கள் ஏமாளிகளா அல்லது நன்றி மறந்தவர்களா? நான் கலைஞரின்ன் திட்டங்களை சொல்வதற்காக மட்டும் பிரசாரம் செய்யவில்லை. எனது தங்கையை தேனியில்தான் திருமணம் செய்து கொடுத்திருக்கிறேன். இங்கே உள்ள அனைவரும் எனது சொந்தங்கள். ஒரு ரவுண்டு, இரண்டு ரவுண்டு என நான்கு ரவுண்டு போனால் என்ன பேசுகிறோம் எனத் தெரியாமலேயே பேசி வருகிறார் அவர். பெயரை மாற்றி சொன்னதற்கு வேட்பாளரை அடிக்கிறார். பெயரை மாற்றி சொன்னதற்கு வேட்பாளர்தான் விஜயகாந்த்தை அடிக்க வேண்டும்.

இந்த ஆளை எப்படி எம்.ஜி.ஆரின் இயக்கத்தில் சேர்த்தனரோ தெரியவில்லை. இவருக்குபோய் 41 தொகுதிகள் ஒதுக்கப்பட்டுள்ளது. இவர் செல்லும் பகுதியில் எல்லாம் இந்த புயல் பின் தொடர்ந்து வந்து அவரது முகத்திரையை கிழிக்கும் என்றார்.