திமுக கூட்டணி வியூகத்தை உடைக்க விஜயகாந்த் திட்டம்

ரிஷிவந்தியம் தொகுதியில் போட்டியிடும் தே.மு.தி.க., தலைவர் விஜயகாந்த், இன்று முதல் நான்கு நாட்கள் அங்கு முகாமிட்டு ஓட்டு வேட்டையாட திட்டமிட்டுள்ளார்.

அ.தி.மு.க., கூட்டணி சார்பில் ரிஷிவந்தியம் தொகுதியில் தே.மு.தி.க., தலைவர் விஜயகாந்த் போட்டியிடுகிறார். இவரை எதிர்த்து, காங்கிரஸ் சிட்டிங் எம்.எல்.ஏ., சிவராஜ் போட்டியிடுகிறார்.

அ.தி.மு.க., கூட்டணி வேட்பாளர்களை ஆதரித்து கடந்த மாதம் 24ம் தேதி முதல், தமிழகம் மற்றும் புதுவையில் விஜயகாந்த் தீவிர பிரச்சாரத்தில் ஈடுபட்டு வருகிறார். வேட்பு மனு தாக்கல் செய்த கடந்த 24ம் தேதி ஒருநாள் மட்டுமே தனது தொகுதியில் அவர் பிரசாரம் செய்தார்.

அவருக்கு ஆதரவாக தே.மு.தி.க., இளைஞர் அணி செயலர் சுதீஷ், விஜயகாந்த் மனைவி பிரேமலதா மூன்று நாட்கள் ரிஷிவந்தியத்தில் தீவிர பிரச்சாரம் செய்தனர். வரும் 9ம் தேதி துவங்கி, தேர்தல் பிரச்சாரம் முடியும் 11ம் தேதி மாலை வரை, மூன்று நாட்கள் ரிஷிவந்தியத்தில் தனக்காக ஓட்டு சேகரிக்க விஜயகாந்த் திட்டமிட்டிருந்தார்.

ஆனால், இவரது தமிழகம், புதுவை தேர்தல் பிரச்சாரப் பயணம் திட்டமிட்டதற்கு ஒருநாள் முன்னதாகவே முடிந்துள்ளது.

அதனால், இன்று முதல் நான்கு நாட்கள் ரிஷிவந்தியம் தொகுதியில் முகாமிட்டு, ஓட்டு வேட்டையாட விஜயகாந்த் முடிவு செய்துள்ளார்.

விஜயகாந்தை எப்படியாவது தோற்கடிக்க வேண்டும் என, தி.மு.க., கூட்டணி கட்சிகள் வியூகம் வகுத்துள்ளன.

இதையறிந்த விஜயகாந்த், தி.மு.க., கூட்டணி வியூகத்தை உடைப்பதற்காகவே கூடுதலாக ஒருநாள் ஒதுக்கி தொகுதியில் பிரச்சாரம் செய்ய இருப்பதாகவும் கூறப்படுகிறது. தற்போது, டெம்போ டிராவலர் என்ற பெரிய வாகனத்தில் விஜயகாந்த் தேர்தல் பிரச்சாரம் செய்து வருகிறார்.

ரிஷிவந்தியம் தொகுதியில் காடு, மேடு என தெருத் தெருவாக வலம் வர விஜயகாந்த் திட்டமிட்டுள்ளார். அதற்கு பெரிய வாகனம் சரிப்படாது என்பதால், சிறிய "ஜீப்' சென்னையிலிருந்து கொண்டு செல்லப்பட்டுள்ளது.