விஜயகாந்த் ரிஷிவந்தியத்தில் போட்டியிடுவது ஏன்? பிரேமலதா பேச்சு

திருக்கோவிலூரை அடுத்த பகண்டை கூட்ரோட்டில் ரிஷிவந்தியம் தொகுதி தேமுதிக செயல்வீரர்கள் கூட்டம் நடைபெற்றது. இதில் கலந்து கொண்டு பேசிய பிரேமலதா விஜயகாந்த்,

கடந்த 20 நாட்களாக தமிழகத்தின் அனைத்துப் பகுதிகளுக்கும் சென்று தேர்தல் சுற்றுப் பயணத்தை முடித்துவிட்டு, அவருடைய தொகுதியில் 3 நாள் பிரசாரத்தை விஜயகாந்த் தொடங்க இருக்கிறார்.

அதிமுக, தேமுதிக கூட்டணி மக்கள் விரும்பிய கூட்டணி. ரிஷிவந்தியம் தொகுதியில் விஜயகாந்த் போட்டியிடுகிறார் என்றதும் எங்கள் வீட்டுக்கு அதிகம் பேர் தொலைபேசியில் தொடர்பு கொண்டு, ரிஷிவந்தியம் தொகுதி எங்கே இருக்கிறது என்று கேட்டார்கள்.

இன்றைக்கு ஏன் விஜயகாந்த் இத்தொகுதியில் போட்டியிடுகிறார் என்றால், அவரும் கிராமத்தில் பிறந்தவர் என்பதுதான் காரணம்.

கிராமங்கள் என்றைக்கு முன்னேறுகிறதோ அன்றைக்குத்தான் தமிழகம் முன்னேறும் எனக் கூறும் விஜயகாந்த்,

ரிஷிவந்தியம் தொகுதியை எல்லா விதத்திலும் முன்னேற்ற, தமிழகத்தில் ஒரு முன்மாதிரியான தொகுதியாக மாற்றுவதை லட்சியமாகக் கொண்டு இங்கு போட்டியிடுகிறார்.

இத்தொகுதிக்கு உட்பட்ட அனைத்துக் கிராமங்களுக்கும் நானும், விஜயகாந்தும் நேரடியாக வந்து மக்களைச் சந்தித்து வாக்குகள் சேகரிக்க உள்ளோம். நான் வந்து அவருக்கு ஓட்டுக் கேட்க வேண்டிய அவசியம் இல்லை. ஏனென்றால் இந்தத் தொகுதியின் மாப்பிள்ளை அவர்.

இந்தத் தொகுதியின் மாப்பிள்ளையாக அவரை ஏற்றுக்கொண்டு அவரை வெற்றி பெறச் செய்வீர்கள் என்ற நம்பிக்கை எனக்கு இருக்கிறது. இதில் எந்த சந்தேகமும் இல்லை என்றார்.