கமல்ஹாசனின் விஸ்வரூபத்துக்கு சிக்கல்

டைரக்டர் செல்வராகவன் இயக்கத்தில், கமல்ஹாசன் நடிக்கும் புதிய படமான விஸ்வரூபத்திற்கு அமெரிக்க அரசு ரூபத்தில் சிக்கல் ஏற்பட்டுள்ளது. படத்திற்கு விஸ்வரூபம் என்று பெயர் வைத்தாலும் வைத்தார்கள்... ஆரம்பத்திலேயே பிரச்னை ஒன்று விஸ்வரூபமாக உருவாகியுள்ளது. கமல் - சோனாக்ஷி சின்கா நடிக்கும் இப்படத்தின் முதல் கட்ட ‌சூட்டிங்கை அமெரிக்காவில் நடத்த திட்டமிட்டிருந்தார் டைரக்டர் செல்வராகவன். இதற்காக முறையாக விண்ணப்பிக்கப்பட்டது. ஆனால் தூதரகத்தில் விஸ்வரூபம் குழுவின் விவரங்களை அலசி ஆராய்ந்த அதிகாரிகள் அத்தனை பேரது விண்ணப்பதையும் ஏற்க மறுத்து விட்டார்களாம். கிட்டத்தட்ட 40 நாட்கள் அங்கு சூட்டிங்கை நடத்த திட்டமிட்டிருந்த செல்வா, தூதரகத்தின் தடையால் அப்செட் ஆனார்.

இதையடுத்து அடுத்த நாளே அடுத்தகட்ட பணிகளை தொடங்கி விட்டார். அந்த அடுத்தகட்ட பணி விஸ்வரூபம் தொடர்பான பணியல்ல; ஏற்கனவே முடிக்காமல் பாதியில் நிற்கும் இரண்டாம் உலகம் பட சூட்டிங்கை மீண்டும் ஆரம்பித்து விட்டாராம். இரண்டாம் உலகம் படத்தின் நாயகன் தனுஷ் என்பதை விட, நாயகி ஆண்ட்ரியா என்பது கவனிக்கத்தக்கது. ஏனென்றால் செல்வராகவனும், அவரது முன்னாள் காதல் மனைவி சோனியா அகர்வாலும் பிரிவதற்கு காரணமாய் கூறப்பட்டவர் இந்த ஆண்ட்ரியாதான் என்பது குறிப்பிடத்தக்கது.