குஷ்பு தமிழ் கற்றுக் கொண்டதே ஜெ.வால்தான் : விந்தியா

டப்பிங் குரலில் பேசிக் கொண்டிருந்த ‌குஷ்பு, தமிழ் கற்றுக் கொண்டதே ஜெயலலிதாவால்தான், என்று நடிகை விந்தியா கூறியுள்ளார். அதிமுக கூட்டணிக்கு ஆதரவாக தேர்தல் பிரசாரம் செய்து வரும் நடிகை விந்தியா, நடிகர் வடிவேலு, நடிகை குஷ்புவுக்கு எதிராக பேசி வருகிறார். காஞ்சிபுரத்தில் அதிமுக வேட்பாளருக்கு ஆதரவாக பிரசாரம் செய்த விந்தியா, குஷ்புவை கடுமையாக விமர்சித்தார். அவர் பேசும்போது, குஷ்புவுக்கு தமிழ் தெரியாது. டப்பிங் வாய்ஸில்தான் பேசிக் கொண்டிருந்தார். அவருக்கு தமிழ் கற்றுக் கொண்டதே ஜெயலலிதாவால்தான். ‌ஜெயா டிவியில் ஜாக்பாட் நிகழ்ச்சி நடத்தியபோதுதான் தமிழ் பேசவே கற்றுக் கொண்டார். அந்த நன்றியைக் கூட குஷ்பு மறுத்து விட்டார், என்று கூறினார். நடிகர் வடிவேலு பற்றி கூறுகையில், அவருக்கு நேரம் சரியில்லை; ஜாக்கிரதையா இருக்க வேண்டும் என்று எச்சரித்தார் விந்தியா. நடிகை விந்தியா பிரசாரத்தின்போது அங்குள்ள ஒரு டீக்கடைக்கு சென்று டீ ஆற்றி ஓட்டு சேகரித்தார்.