ஜெய் நடிக்கும் எங்கேயும் எப்போதும்

சுப்ரமணியபுரம், கோவா உள்ளிட்ட படங்களில் நடித்த நடிகர் ஜெய் அடுத்து எங்கேயும் எப்போதும் என்ற படத்தில் நடிக்க இருக்கிறார். இப்படத்தை புதுமுகம் சரவணன் இயக்குகிறார்.

பகவதி படத்தில் விஜய் தம்பியாக அறிமுகமான நடிகர் ஜெய், தொடர்ந்து சென்னை-28 படத்தில் நடித்தார். அதனைத்தொடர்ந்து டைரக்டர் சசிகுமாரின் சுப்ரமணியபுரம் படத்தின் மூலம் பிரபலமானார். சுப்ரமணியபுரம் படத்திற்கு பிறகு நிறைய படவாய்ப்புகள் வந்தன. தொடர்ந்து கோவா, வாமனன், அவள் பெயர் தமிழரசி, கனிமொழி உள்ளிட்ட படங்களில் நடித்தார். இவற்றில் கடைசியாக வந்த இரண்டு படங்கள் தோல்வியடைந்தன. இருந்தும் நம்பிக்கையுடன் தொடர்ந்து நடித்து வருகிறார். தற்போது அர்ஜூனனின் காதலி, கோ உள்ளிட்ட படங்களில் நடித்துள்ளார். விரைவில் இப்படம் வெளிவர இருக்கிறது.

இதற்கு அடுத்து சிம்புவின் வேட்டை மன்னன் படத்தில் நடிக்கிறார். அதனைத்தொடர்ந்து மற்றொரு புதிய படத்தில் நடிக்கிறார். இப்படத்தை டைரக்டர் ஏ.ஆர்.முருகதாஸ் தயாரிக்க புதுமுகம் சரவணன் இயக்குகிறார். இப்படத்திற்கு எங்கேயும் எப்போதும் என்று பெயரிட்டுள்ளனர். படத்தில் ஜெய்க்கு ஜோடியாக அஞ்சலி நடிப்பார் எனத் தெரிகிறது.

படம்குறித்து ஜெய் கூறியதாவது, தொடர்ந்து என்னுடைய படங்கள் தோல்வியடைந்ததற்கு சரியான கதை அமையாதது தான் காரணம். தவறான கதையை தேர்ந்தெடுந்து நடித்துவிட்டேன் அதனால் கடைசி இரண்டு படங்கள் தோல்வியடைந்தது. ஆனால் இப்போது தெளிவாக இருக்கிறேன். இனிமேல் அந்த தவறை செய்ய மாட்டேன். நடிப்பதற்கு முன்பு நன்றாக கதையை கேட்ட பின்னர் தான் படத்தில் நடிக்க ஒப்புக்கொள்கிறேன். இவ்வாறு அவர் கூறினார்.