சென்னையில் மரணமடைந்த நடிகை சுஜாதாவின் உடல் அடக்கம் செய்யப்பட்டது. முன்னதாக அவரது உடலுக்கு கமல் உள்ளிட்ட பல்வேறு திரை நட்சத்திரங்கள் நேரில் வந்து அஞ்சலி செலுத்தினர்.
டைரக்டர் பாலசந்தரின் அவள் ஒரு தொடர்கதை படத்தின் மூலம் பிரபலமான நடிகை சுஜாதா தமிழ், தெலுங்கு மலையாளம், கன்னடம் உட்பட பல்வேறு மொழிகளில் 100க்கும் மேற்பட்ட படங்களில் நடித்துள்ளார். திருமணத்திற்கு பிறகு சினிமாவில் இருந்து சிறிது காலம் ஒதுங்கியிருந்த சுஜாதா, பிறகு மீண்டும் சினிமாவில் பிரவேசம் செய்து அம்மா, அக்கா போன்ற குணச்சித்திர வேடங்களில் நடித்தார். பின்னர் மொத்தமாக சினிமாவிற்கு முழுக்கு போட்டார். கடைசியாக அஜீத்தின் வரலாறு படத்தில் நடித்து இருந்தார்.
இதனிடையே சிலதினங்களுக்கு முன்னர் உடல்நலம் பாதிக்கப்பட்ட சுஜாதா, சென்னையில் நேற்று தனது வீட்டில் மரணம் அடைந்தார். 1952ம் ஆண்டு இலங்கையில் பிறந்த சுஜாதா, மலையாளத்தை சேர்ந்தவர். இவரது கணவர் ஜெயகர் தொழிலதிபராக உள்ளார். இவருக்கு திவ்யா என்ற மகளும், ஷாஜித் என்ற மகனும் உள்ளனர். சுஜாதாவின் மறைவிற்கு நடிகர்கள் கமல், சரத்பாபு, ராஜேஷ், பொன்வண்ணன், நடிகைகள் கே.ஆர்.விஜயா, குயிலி, சரண்யா, டைரக்டர்கள் பாலசந்தர், வியட்நாம் வீடு சுந்தரம் உள்ளிட்ட பலர் நேரில் வந்து அஞ்சலி செலுத்தினர்.
பின்னர் ஊர்வலமாக எடுத்துவரப்பட்ட சுஜாதாவின் உடல் சென்னை, கீழ்ப்பாக்கம் அருகேயுள்ள கல்லறை தோட்டத்தில் அடக்கம் செய்யப்பட்டது.
ஆழ்ந்த அனுதாபங்கள். அவரது ஆன்மா சாந்தியடையட்டும்.
ReplyDelete