விழியே பேசு...: சென்னை திரும்பினார் நடிகர் ராமராஜன்! பிரச்சாரத்துக்கு ரெடியாகிறார்

Thursday, March 3, 2011

சென்னை திரும்பினார் நடிகர் ராமராஜன்! பிரச்சாரத்துக்கு ரெடியாகிறார்

மதுரை அருகே நடந்த கார் விபத்தில் சிக்கி படுகாயமடைந்த நடிகர் ராமராஜன், சுமார் 2 மாத கால சிகிச்சைக்கு பிறகு சென்னை திரும்பியுள்ளார். நடிகர் ராமராஜன் மதுரை அருகே அ.தி.மு.க. பொதுக்கூட்டத்தில் பேசிவிட்டு, கார் மூலம் திருச்செந்தூருக்கு புறப்பட்டு சென்றபோது விபத்தில் சிக்கினார். இந்த கோரவிபத்தில் கார் டிரைவர் சம்பவ இடத்திலேயே பலியானார். ராமராஜன் பலத்த காயங்களுடன் உயிருக்கு ஆபத்தான நிலையில் மதுரையில் உள்ள தனியார் மருத்துவமனையில் அனுமதிக்கப்பட்டார். டாக்டர்கள் அவருக்கு தீவிர சிகிச்சை அளித்து உயிரை காப்பாற்றினர்.

சுமார் 2 மாத காலம் மதுரை மருத்துவமனையில் சிகிச்சை பெற்று வந்த ராமராஜன் ஓரளவு குணமாகி விட்டதால் சென்னை திரும்பியுள்ளார். எழுந்து நடக்க முடியாத நிலையில், சென்னை ‌போரூர் பகுதியில் அடுக்குமாடி குடியிருப்பு வீட்டில் தங்கியிருந்து பிசியோதெரபி சிகிச்சை ‌மேற்கொண்டு வருகிறார். இன்னும் ஓரிரு வாரங்களில் எழுந்து நடக்கலாம் என்று டாக்டர்கள் தெரிவித்துள்ளனர். சட்டசபை தேர்தல் தேதி அறிவிக்கப்பட்டுள்ள நிலையில், தன்னால் தேர்தல் பிரசாரத்தில் ஈடுபட முடியவில்லையே என்ற வருத்தத்தில் இருக்கும் ராமராஜன், கண்டிப்பாக தேர்தல் நேரத்தில் அம்மா அனுமதியுடன் பிரசாரம் செய்வேன் என்று கூறியுள்ளார்.

ராமராஜன் விபத்தில் சிக்கி உயிருக்கு ஆபத்தான நிலையில் இருந்தபோது, அதிமுக பொதுச்செயலாளர் ஜெயலலிதா மருத்துவச் செலவுகள் அனைத்தையும் ஏற்றுக் கொண்டார் என்பது குறிப்பிடத்தக்கது.

இன்றைய பதிவுகள்...