அடுத்த ஆண்டு நவம்பர் 24-ந்தேதிக்கு பிறகு காலாவதி ஆகும் பாஸ்போர்ட்

இந்திய நாட்டின் குடிமகன் வெளிநாடு செல்ல வேண்டுமெனில் அவருக்கு பாஸ்போர்ட் தேவை. இந்த பாஸ்போர்ட் முன்பு கையால் எழுதப்பட்டிருந்தது. தற்போது நவீன காலத்தில் அவை கம்ப்யூட்டர் மயமாக மாறியுள்ளது. ஏற்கனவே உள்ள கையால் எழுதப்பட்ட பாஸ்போர்ட் அடுத்த ஆண்டு நவம்வர் 24-ந்தேதி முதல் செல்லாது என்று மத்திய அரசு பாராளுமன்றத்தில் இன்று தெரிவித்துள்ளது.

பாராளுமன்றத்தில் தி.மு.க. உறுப்பினர் கனிமொழி கேட்ட கேள்விக்கு வெளியுறத்துறை இணை அமைச்சர் வி.கே. சிங் எழுத்துப்பூர்வமாக பதில் அளித்தார். அப்போது அவர் கூறியதாவது:-

உலகம் முழுவதும் கையால் எழுதப்பட்ட பாஸ்போர்ட் அடுத்த ஆண்டு நவம்பர் மாதம் 24-ந்தேதிக்குப் பின் செல்லாது என்று சர்வதேச விமான போக்குவரத்து அமைப்பு தெரிவித்துள்ளது. நவம்பர் 25-ந்தேதி முதல் வெளிநாடுகள், இதுபோன்ற பாஸ்போர்ட் வைத்திருந்தவர்களை தடுத்து நிறுத்தலாம்.

கடந்த 2001-ம் ஆண்டுக்குப் பிறகு நவீன தொழில்நுட்பத்துடன் கூடிய பாஸ்போர்ட் (மெஷின் ரீடபிள் பாஸ்போர்ட்) வழங்கப்பட்டு வருகிறது. 1990-ம் ஆண்டுகளில் கையால் எழுதப்பட்ட பாஸ்போர்ட் வழங்கப்பட்டது. இதன் 20 வருட செல்லுபடியாகும் காலம் முடிந்துவிட்டது. இந்தியாவில் வசிக்கும் இந்திய குடிமகன்கள் தங்கள் 20 வருடத்திற்கு முன்பு உள்ள பழைய பாஸ்போர்ட்டுகளை நவம்பர் 24-ந்தேதிக்குள் மாற்றி வெளிநாடுகளுக்கு சிரமமின்றி செல்ல வேண்டும் என்று அறிவுறுத்தப்பட்டுள்ளது.

இவ்வாறு அவர் கூறினார்.