விழியே பேசு...: ஜெயலலிதாவுக்கு விஜயகாந்த் ஆப்பு :ஜெ. அணி கூட்டம் விஜயகாந்த் புறக்கணிப்பு

Wednesday, April 6, 2011

ஜெயலலிதாவுக்கு விஜயகாந்த் ஆப்பு :ஜெ. அணி கூட்டம் விஜயகாந்த் புறக்கணிப்பு

கோவையில் நடைபெறவுள்ள அதிமுக கூட்டணிக் கட்சித் தலைவர்கள் கலந்துகொள்ளும் பொதுக்கூட்டத்தில் பங்கேற்காமல் தேமுதிக தலைவர் விஜயகாந்த் புறக்கணித்துவிட்டார். அவருக்கு பதில் தேமுதிக அவைத் தலைவர் பண்ருட்டி ராமச்சந்திரன் கோவை கூட்டத்தில் பங்கேற்கிறார்.

கோவை வஉசி மைதானத்தில் நடைபெறும் அதிமுக கூட்டணிக் கட்சித் தலைவர்கள் கலந்துகொள்ளும் பொதுக்கூட்டத்திற்கு அதிமுக பொதுச்செயலாளர் ஜெயலலிதா தலைமை வகிக்கிறார். மார்க்சிஸ்ட் கம்யூனிஸ்ட் கட்சியின் பிரகாஷ் காரத், ஜி.ராமகிருஷ்ணன், இந்திய கம்யூனிஸ்ட் கட்சியின் பரதன், டி.ராஜா, சமத்துவ மக்கள் கட்சித் தலைவர் சரத்குமார், புதிய தமிழகம் கட்சித் தலைவர் டாக்டர் கிருஷ்ணசாமி உள்பட கூட்டணி கட்சித் தலைவர்கள் பங்கேற்க கோவை வந்துள்ளனர்.

அதிமுக கூட்டணியில் அதிக இடங்களை பெற்றிருக்கும் தேமுதிக கட்சித் தலைவர் விஜயகாந்த் மட்டும் வரவில்லை. அவருக்கு பதில் அவைத் தலைவர் பண்ருட்டி ராமச்சந்திரன் கலந்துகொள்ள உள்ளார்.

கூட்டணியில் ஒருங்கிணைப்பு இல்லை என்று அதிமுக கூட்டணிக்கு எதிரான கட்சிகள் குற்றம் சாட்டுவதால், பொதுக்கூட்டம் நடத்த கம்யூனிஸ்ட் கட்சியினர் யோசனை தெரிவித்தனர். இதனை ஜெயலலிதா ஏற்று பொதுக்கூட்டத்திற்கு சம்மதம் தெரிவித்திருந்தார். ஆனால் திடீரென்று விஜயகாந்த் பொதுக்கூட்டத்திற்கு வராததது அதிமுக மூத்த நிர்வாகிகள் முதல் தொண்டர்கள் வரை அதிருப்தியை ஏற்படுத்தியுள்ளது.

விஜயகாந்த் கடந்த சில நாட்களுக்கு முன்பு பிரச்சாரத்தில் ஈடுபட்டிருந்தபோது, அதிமுக கொடிகளை இறக்கச் சொல்லியும், அதிமுக கொள்கை இல்லாத கட்சி என்றும் கூறியும் பரபரப்பை ஏற்படுத்தினார். கூட்டணி சம்மந்தமாக ஜெயலலிதாவை விஜயகாந்த் இதுவரை ஒரேஒரு முறை மட்டுமே சந்தித்துள்ளார்.

இதேபோல திருச்சி பகுதியில் பிரச்சாரம் செய்த விஜயகாந்த், ஸ்ரீரங்கம் தொகுதியில் போட்டியிடும் ஜெயலலிதா பெயரைச் சொல்லி வாக்கு கேட்கவில்லை. இதேபோல் விழுப்புரம் மாவட்டத்தில் பிரச்சாரம் செய்த ஜெயலலிதா ரிஷிவந்தியம் தொகுதியில் போட்டியிடும் விஜயகாந்த் பெயரைச் சொல்லியோ அவரது கட்சி பெயரைச் சொல்லியோ வாக்கு கேட்கவில்லை.

வேட்பாளரை அடித்த விஜயகாந்த்துடன் கூட்டணி கட்சி தலைவர்கள் மேடை ஏற தயங்குகிறார்கள் என்று அதிமுக கூட்டணிக்கு எதிரான கட்சிகள் கூறி வந்தன. மேலும், தான் முதல்வர் என்று கூறி வந்த விஜயகாந்த், ஜெயலலிதாவை எப்படி முதல் அமைச்சர் என்று கூறுவார் என்றும், ஜெயலலிதா முன்னிலையில் தான் ஒரு கருப்பு எம்ஜிஆர் என்று விஜயகாந்த் கூறுவாரா என்றும் ஜெயலலிதாதான் எப்பவுமே முதல் அமைச்சர் என்று விஜயகாந்த் கூறுவாரா என்றும் நடிகர் வடிவேலு சாவல் விட்டிருந்தார்.

இந்த நிலையில், கோவை அதிமுக கூட்டணி கட்சி பொதுக்கூட்டத்தை விஜயகாந்த் புறக்கணித்துள்ளார். இதனால் அதிமுக கூட்டணி கட்சிகளுக்கிடையே குழப்பத்தை ஏற்படுத்தியுள்ளது.