Friday, August 31, 2012

பதவி விலகும் பேச்சுக்கே இடமில்லை: மன்மோகன் சிங் திட்டவட்டம்

ஈரான் பயணத்தை முடித்துக்கொண்டு பிரதமர் மன்மோகன்சிங் இன்று நாடு திரும்பினார். விமானத்தில் அவர் நிருபர்களிடம் கூறியதாவது:-
நிலக்கரி சுரங்கங்கள் ஒதுக்கீடு தொடர்பாக பதவி விலகும் பேச்சுக்கே இடமில்லை. பிரதமர் அலுவலகத்தின் மாண்பை தொடர்ந்து காப்பேன்.

சுரங்க ஒதுக்கீடு தொடர்பாக எதிர்க்கட்சிகள் நாடாளுமன்றத்தின் அலுவல்களை தடுத்து வருகின்றன. இதனால் அரசு நிர்வாகம் பாதிக்கப்படுகிறது. அதேசமயம் எதிர்க்கட்சிகளின் புகார்களுக்கு போட்டியாக எதுவும் பேசமாட்டேன். போட்டியாக பேசி எதையும் பெற முடியாது. எனவேதான் நான் முன்பு கூறியதுபோல் அமைதியாக இருக்கிறேன்.

உள்நாட்டு அரசியலில் ஒருங்கிணைப்பு இல்லாததால், 9 சதவீத பொருளாதார வளர்ச்சி என்ற இலக்கிற்கான அடித்தளத்தை நாம் அமைக்க முடியவில்லை.

இந்தியாவில் தீவிரவாத செயல்களில் ஈடுபடும் பாகிஸ்தான் தீவிரவாதிகளை ஒடுக்குவதில், பாகிஸ்தான் அரசு உண்மையான உணர்வுடன் செயல்படவேண்டியது அவசியம். குறிப்பாக மும்பைத் தாக்குதல் தீவிரவாதிகளிடம் விசாரணை நடத்துவது பாகிஸ்தானுக்கு முக்கியமான சோதனையாகும்.

இந்தியாவுடன் இணைந்து வர்த்தகம் செய்ய ஈரான் ஆர்வமாக உள்ளது. ஈரான் மீது பொருளாதார தடைகள் இருப்பதால் இது கடினமாகவே இருக்கும். இருப்பினும் ஈரானுடன் உறவுகளை மேம்படுத்தும் வழிமுறைகள் பற்றி ஆராயப்படும். அணி சேரா நாடுகள் மாநாடு எந்த நாட்டுக்கும் எதிராக நடத்தப்பட்டது அல்ல. 

இவ்வாறு அவர் கூறினார்.


No comments:

Post a Comment