சொன்னதை தராத கருணாநிதி சொல்லாத ஸ்பெக்ட்ரத்தை தந்தார்:நடிகர் செந்தில் பேச்சு

""சொன்னபடி 2 ஏக்கர் நிலத்தை தரவில்லை. ஆனால், சொல்லாத ஸ்பெக்ட்ரம் ஊழல், விலைவாசி உயர்வை கருணாநிதி தந்துள்ளார்,'' என நடிகர் செந்தில் பேசினார்.நத்தத்தில் அ.தி.மு.க., வேட்பாளர் விசுவநாதனை ஆதரித்து அவர் பேசியதாவது: கருணாநிதி இலவச "டிவி' கொடுத்தார். அவரது வீட்டு பணத்திலா கொடுத்தார். மக்களின் வரிப்பணத்தில் கொடுத்து விட்டு, மாதம் கேபிள் பணம் ரூ.500 கோடியை தனது வீட்டிற்கு செல்ல வழி வகுத்தார். இந்தியை எதிர்த்த கருணாநிதி, வடநாட்டு பெண்ணாகிய குஷ்பூவை அழைத்து பிரசாரம் செய்கிறார். கருணாநிதி சொன்னதை செய்வோம்; சொல்லாததையும் செய்வோம், என்றார்.

சொன்னது 2 ஏக்கர் நிலம், அதை தரவே இல்லை. சொல்லாதது ஸ்பெக்ட்ரம் ஊழல், விலைவாசி உயர்வு, பெட்ரோல் விலை, சிமென்ட், கம்பி விலை உயர்வு, மின்சாரம் கட் ஆகியவற்றை கொடுத்துள்ளார்.குஷ்பு கற்பு பற்றி பேசிய போது பா.ம.க.,வும், விடுதலை சிறுத்தையும் முட்டை வீசின. தற்போது அவருக்கு வரவேற்பளிப்பது அவமானம் இல்லையா. விஜயகாந்த் கீழே விழுந்த மைக்கை எடுக்கிறார். அதை வேட்பாளரை அடிப்பதாக கருணாநிதி ஆதரவு "டிவி'க்கள் காட்டுகிறது. ஜெயலலிதா ஆட்சியில் சட்டம், ஒழுங்கு பிரச்னை இல்லாமல் இருந்தது. வடிவேலுக்கு பதில் சொல்வதற்கு சிங்கமுத்து வருவார். பேரன்களை இந்தி படிக்க வைத்து விட்டு, செம்மொழி மாநாடு நடத்தியவர், கருணாநிதி. தங்கபாலு மோசமானவர், தனது மனைவியை ஏமாற்றி சீட் வாங்கியுள்ளார். தமிழகத்தை ஆள தகுதியானவர் ஜெயலலிதா தான். இதை மக்கள் நன்கு அறிவார்கள். இவ்வாறு அவர் பேசினார்.