ஏற்றி விட்ட ஏணியை எட்டி உதைக்கிறார் வடிவேலு; ஆர்.வி.உதயகுமார்

அ.தி.மு.க. வேட்பாளர்களை ஆதரித்து டைரக்டர் ஆர்.வி. உதயகுமார் பிரசாரம் செய்து வருகிறார். நேற்று அவர் நாகர்கோவில் தொகுதி அ.தி.மு.க. வேட்பாளர் நாஞ்சில் முருகேசனை ஆதரித்து பார்வதிபுரத்தில் பிரசாரம் செய்தார். பிரச்சாத்தில் அவர் பேசும்போது,

’’விஜயகாந்த் ஒரு நல்ல மனிதர். எதையும் ஓப்பனாக பேசுவார். அவரை வைத்து நான் சின்னக்கவுண்டர் படம் இயக்கும்போது நடிக்க வாய்ப்பு கேட்டு வந்தவர்தான் வடிவேலு. அந்த படத்தில் விஜயகாந்துக்கு குடை பிடிப்பவராக வடிவேலு நடித்திருப்பார்.விஜயகாந்திடம், பாவம் உங்கள் ஊர் பையன்தான் அண்ணே! என்று, நான்தான் அறிமுகம் செய்து வைத்தேன்.

விஜயகாந்த் அவரை தட்டிக்கொடுத்து வளர்த்து விட்டார். ஆனால் ஏற்றிவிட்ட ஏணியை வடிவேலு எட்டி உதைத்துள்ளார்.

தி.மு.க.வுக்கு ஆதரவாக பேசும் அவர் வேட்பாளரை மதிப்பதே கிடையாது. திரை உலகம் இன்று ஒரே குடும்பத்தை நம்பி உள்ளது. இவர்களுக்கு ஜெயலலிதா மட்டும்தான் விடுதலை வாங்கித்தர முடியும்.

நாகர்கோவில் தொகுதியில் போட்டியிடும் அ.தி.மு.க. வேட்பாளர் நாஞ்சில் முருகேசன் எளிமையானவர். தொகுதியை நல்லதாக மாற்றிக்காட்டுவார். எனவே, அவரை வெற்றி பெறச் செய்ய வேண்டும்’’ என்று கூறினார்.