மதுரை நகரில் சோலை அழகுபுரம், காஜிமார்தெரு, ஆரப்பாளையம் கிராஸ்ரோடு, எஸ்.எஸ் காலனி ஆகிய பகுதிகளில் அ.தி.மு.க., தே.மு.தி.க கூட்டணி கட்சி வேட்பாளர்களை ஆத ரித்து தே.மு.தி.க. தலைவர் விஜயகாந்த் நேற்று பிரசாரம் செய்தார்.
அவர் பேசும்போது கூறியதாவது:-
ஏற்கனவே நமது கூட்டணி கட்சியினர் கொடிகளை உயர்த்தி காட்டியபோது பொதுமக்கள் என்னை பார்க்கும் வகையில் அவற்றை இறக்கும்படி கூறினேன். இதில் என்ன தவறு என்று தெரியவில்லை. அதனை மீண்டும் மீண்டும் ஒளிபரப்புகிறார்கள்.
நான் தி.மு.க. அணிக்கு வருவேன் என்று எதிர்பார்த்தார்கள். அப்படி வந்தால் நமது கட்சியை தனியாக தேர்தலை சந்திக்கும்படி கூறி, அதன் மூலம் அவர்கள் மீண்டும் ஆட்சிக்கு வர வேண்டும் என்று கனவு கண்டார்கள். ஆனால் அதற்கு எதிராக தற்போது அ.தி.மு.க. கூட்டணியில் நாம் இணைந்ததால் அவர்களுக்கு கடுமையான கோபம்.
தேர்தல் அதிகாரிகள் ஒத்துழைப்பு கொடுக்கவில்லை என்று மத்திய மந்திரி ப.சிதம்பரத்திடம் தி.மு.க. தலைவர் பேசுகிறார். இதற்கு காரணம் தோல்வி பயம். மதுரைக்கு கலெக்டராக நியமிக்கப்பட்ட சகாயம், தி.மு.க. தரப்பிற்கு ஆதரவாக இருப்பார் என்று நினைத்தார்கள். அப்படி இல்லாததால் அவர் மீது ஏராளமான குறைகளை கூறுகிறார்கள்.
விலைவாசி உயர்வு என்பது மக்களின் அடிப்படை பிரச்சினை கேட்டால் ஒரு ரூபாய்க்கு அரிசி தருவதாக கூறுகிறார்கள். அந்த அரிசியை தண்ணீரில் ஊற வைத்தா சாப்பிட முடியும்? குழம்பு வைக்க தேவைப்படும் பருப்பு உள்பட அனைத்து பொருட்களின் விலையும் கடுமையாக உயர்ந்துள்ளது.
இந்த கஷ்டம் பெண்களுக்குத்தான் அதிகம் தெரியும். தேர்தல் நெருங்கிய நிலையில் உடல்நிலை சரியில்லை என்று ஆஸ்பத்திரியில் சேர்ந்து உங்களிடம் அனுதாப ஓட்டுகளை வாங்க கருணாநிதி முடிவு செய்துள்ளார். அப்படி நடக்காமல் பார்த்து கொள்ளுங்கள்.
தான் பட்டினியாக இருந்தாலும் கணவரும், குழந்தைகளும் நன்றாக சாப்பிட்டு நலமாக இருக்க வேண்டும் என்று நினைக்கும் தாய்மார்களை விலைவசி உயர்வு கடுமையாக கவலைப்பட வைத்துள்ளது. எரியும் அடுப்பின் அருகில் படுக்கலாம்.
ஆனால் பசியுடன் படுக்க முடியாது. எனவே விலைவாசி உயர்வை கட்டுப்படுத்த எங்கள் கூட்டணிக்கு ஒரு வாய்ப்பு தாருங்கள். எங்களை வெற்றிப்பெற செய்யுங்கள். உங்களை தேடி நான் வருவேன். தேவையானதை நிச்சயம் செய்வேன்.
இவ்வாறு அவர் பேசினார்.
No comments:
Post a Comment