ரஜினிக்கும் தொடர்பு உண்டு கதைவிடும் இயக்குனர்!

'பெருமான்' இது படத்தின் பெயர். இதற்கு சப் டைட்டில் தி ரஜினிகாந்த் என்பது! ரஜினி என்ற மூன்றெழுத்து மந்திரத்தை சினிமா டைட்டில் வரைக்கும் கொண்டு வந்துவிட்ட அந்த பக்தனின் பெயர் ராஜேஷ் கண்ணன். இப்படத்தை இயக்கிக் கொண்டிருக்கும் இவருக்கும் ரஜினிக்கும் என்ன தொடர்பு?

அவரே சொல்கிறார். நான் ஏழு வயசுல சென்னைக்கு வந்தேன். வந்தவுடன் கேட்ட முதல் வார்த்தை ரஜினி வீடு எங்கேயிருக்கு என்றுதான். ஆனால் என்னை அங்கே உள்ளேயே விடல. ஆனால், சில வருடங்களில் அதே ரஜினி சாருக்கு கதை சொல்கிற பாக்கியம் கிடைச்சுது. கதையை கேட்ட ரஜினி சார், உங்ககிட்ட ஒரு ஃபயர் இருக்கு. நீங்க என்னோட பாபா படத்தில் வொர்க் பண்ண முடியுமான்னு கேட்டார். அந்த படத்தில் நான் அவருடன் பழகியதை என்னால் மறக்கவே முடியாது. தோன்றிற் புகழோடு தோன்றுக என்ற குறளுக்கு பொருத்தமானவர் அவர்.

இந்த படத்தின் கதைக்கும் அவருக்கும் நிச்சயம் ஒரு தொடர்பு இருக்கு. அதை இப்போதே சொல்ல மாட்டேன். அப்படி சொன்னால் கதையின் முடிச்சே அவிழ்ந்த மாதிரி. அதனால் இப்போ தோண்டி தோண்டி கேட்பதை விட்ருங்க என்றார்.

சன், விஜய் போன்ற சேனல்களில் முக்கிய நிகழ்ச்சிகளை இயக்கிக் கொண்டிருந்த இந்த ராஜேஷ் கண்ணன், முன் தயாரிப்பு பணிகளுக்காக செலவிட்ட ஆண்டுகள் மட்டும் இரண்டு வருடங்கள் என்கிறார். இதுதான் ஸ்பீல்பெர்க் பாணி என்று அவரே ஃபீல் பண்ணி சொல்வது நம்பிக்கையூட்டுகிறது.

அர்ஜுன், ஸ்ருதி என்ற புதுமுகங்கள் நடிக்கிறார்கள். பெரியார் படத்தை ஒளிப்பதிவு செய்த சி.ஜே.ராஜ்குமார் இப்படத்தை ஒளிப்பதிவு செய்கிறார். இசை லுயூஜி.

பின்குறிப்பு- ஒரே நேரத்தில் ஆங்கிலத்திலும், தமிழிலும் இப்படம் வெளியாகிறது. ஆங்கில தலைப்பு சிக்ஸ் மிலியன் டாலர்ஸ். இதற்கும் சப் டைட்டில் உண்டு. அது- தி ரஜினிகாந்த்!