விஜயகாந்த்துக்கு வாக்களித்தால் அவரை சென்னைக்குச் சென்றுதான் பார்க்க வேண்டும். அப்படியே அங்கு சென்றாலும் அவரை அவ்வளவு எளிதாகப் பார்க்க முடியாது என, நடிகர் பாண்டு பேசினார்.
திருக்கோவிலூரை அடுத்த பகண்டை கூட்ரோட்டில் திறந்தவேனில் நின்றபடி ரிஷிவந்தியம் தொகுதி காங்கிரஸ் வேட்பாளர் எஸ்.சிவராஜை ஆதரித்து நடிகர் பாண்டு பிரச்சாரம் செய்தார். அப்போது பேசிய அவர்,
நான் இதுவரையில் 827 திரைப்படத்தில் நடித்துள்ளேன். ஆனால் அரசியல் கட்சி மேடைகளில் ஏறி இதுவரையில் நான் பேசியது கிடையாது. இப்போதுதான் முதன் முதலில் தேர்தல் பிரசாரத்தில் ஈடுபட்டுள்ளேன்.
காரணம் இத்தொகுதியில் போட்டியிடும் எஸ்.சிவராஜ் எனக்கு மிகவும் நெருங்கிய சொந்தக்காரர் என்பதாலும், அவர் காங்கிரஸ் கட்சியைச் சேர்ந்தவர் என்பதாலும் நான் அவருக்கு ஆதரவாக உங்களிடத்தில் வாக்குகள் சேகரிக்க வந்துள்ளேன்.
கடந்த 2006 பேரவைத் தேர்தலில் விருத்தாசலம் தொகுதியில் போட்டியிட்ட விஜயகாந்த் அப்போது 61 ஆயிரம் வாக்குகள் பெற்று வெற்றிப்பெற்றார். அதன்பின் நடைபெற்ற நாடாளுமன்றத் தேர்தலில் அத்தொகுதியில் வெறும் 12 ஆயிரம் வாக்குகளை மட்டுமே தேமுதிக கட்சி பெற்றது.
காரணம் அத்தொகுதி மக்களின் எதிர்பார்ப்பை விஜயகாந்த் நிறைவேற்றவில்லை என்பதுதான் இதற்கு அர்த்தம். எனவே விருத்தாசலம் தொகுதி மக்கள் படும்பாட்டை நீங்களும் படக்கூடாது. நீங்கள் விஜயகாந்த்துக்கு வாக்களித்தால் அவரை சென்னைக்குச் சென்றுதான் பார்க்க வேண்டும். அப்படியே அங்கு சென்றாலும் அவரை அவ்வளவு எளிதாகப் பார்க்க முடியாது என்றார்.
No comments:
Post a Comment