ஜெயலலிதாவுடன் விஜய் அப்பா, நடத்திய பேரம் அம்பலம்!

அதிமுக கூட்டணிக்கு ஆதரவு தெரிவித்து பிரசாரம் செய்வதற்காக ஜெயலலிதாவிடம், டைரக்டர் எஸ்.ஏ.சந்திரசேகர் பேரம் பேசிய விவகாரத்தை, விஜய் மக்கள் இயக்க மாநில  தலைவர் வெளியிட்டுள்ளார். நடிகர் விஜய் மக்கள் இயக்க மாநில தலைவர் ஜெயசீலனை பொறுப்பில் இருந்து நீக்குவதாக விஜய் மக்கள் இயக்க நிறுவன தலைவர் எஸ்.ஏ.சந்திரசேகரன் அறிவித்தார். இதுதொடர்பாக அவர் வெளியிட்ட அறிக்கையில், நமது மக்கள் இயக்கத்தின் ஆதரவை பொதுக்குழு எடுத்த முடிவுப்படி அ.தி.மு.க.வுக்கு தெரிவித்ததை ஏற்றுக் கொண்டு தமிழகம் முழுவதும் உள்ள இயக்க தொண்டர்கள் அனைவரும் அ.தி.மு.க. அணியின் வெற்றிக்கு, தேர்தல் களம் இறங்கி முழுமூச்சுடன் செயல்பட்டு வருகிறார்கள். இந்நிலையில் நமது பொதுக்குழு முடிவிற்கு எதிராக நமது கட்டுப்பாட்டை சீர்குலைக்க முயற்சி செய்து கொண்டிருந்த மாநில ரசிகர் மன்ற தலைவர் சி.ஜெயசீலன், திருவள்ளூர் கிழக்கு மாவட்ட தலைவர் ஸ்டாலின் பிரபு ஆகியோரை அவர்களது பொறுப்பு மற்றும் அடிப்படை உறுப்பினர் பொறுப்பிலிருந்தும் நீக்கி வைக்கிறோம். அவர்களுடன் நமது இயக்கத்தினர் எந்த தொடர்பும் வைத்துக் கொள்ள வேண்டாம், என்று கூறியுள்ளார்.

இந்நிலையில் தனது ஆதரவாளர்களுடன் திமுகவில் தன்னை இணைத்துக் கொண்ட ஜெயசீலன், எஸ்.ஏ.சி மீது பரபரப்பு குற்றச்சாட்டை தெரிவித்திருக்கிறார். இதுதொடர்பாக அவர் அளித்துள்ள பேட்டியில், எஸ்.ஏ.சி அதிமுகவுக்கு ஆதரவாக பிரச்சாரம் செய்வதோ, இந்த தேர்தலில் விஜய் மக்கள் இயக்கத்தை ஆதரிக்க வைப்பதோ, மக்கள் மீதும் மன்றத்தின் மீதும் இருக்கிற பற்றினால் அல்ல. ஜெயலலிதாவை சந்தித்த அவர், இந்த தேர்தலில் அதிமுக வெற்றி பெற்று ஆட்சி அமைத்தால் தனக்கு மதுபான ஆலை வைக்க லைசென்ஸ் தரும்படி கேட்டிருப்பதாக சந்தேகப்படுகிறேன். இந்த தேர்தலில் நிற்க சீட் கேட்டிருந்தால் கூட கொடுத்திருப்பார்கள். ஆனால் அவர் கேட்டது இந்த லைசென்சைதானாம். தனிப்பட்ட லாபத்திற்காக எங்களை அடகு வைப்பதை எப்படி பொறுத்துக் கொள்ள முடியும், என்று கூறி எஸ்.ஏ.சி., வயிற்றில் பீதியை கிளப்பி விட்டிருக்கிறார்.