எம்.ஜிஆர். கட்சியில் சேர்ந்து இருக்கிறேன்: விஜயகாந்த்

நான் எம்.ஜிஆர். ஆரம்பித்த கட்சியில் இன்று சேர்ந்து இருக்கிறேன் என, விஜயகாந்த் பேசினார்.

தே.மு.தி.க. தலைவர் விஜயகாந்த் குமரி மாவட்டத்தில் தேர்தல் பிரசாரம் செய்தார். பத்மநாபபுரம் தொகுதி தே.மு.தி.க. வேட்பாளர் எஸ்.ஆஸ்டினுக்கு ஆதரவாக குலசேகரம் பகுதியில் பிரசாரம் செய்தார். பிரசாரத்தின் போது அவர் கூறியதாவது:

எனக்கு மதமும் கிடையாது. ஜாதியும் கிடையாது. பைபிள் ஆனாலும் சரி, குரான் ஆனாலும் சரி, பகவத்கீதை ஆனாலும் சரி அன்பையே போதிக்கிறது.  கூடாரங்கள் வெவ்வேறாக இருக்கலாம், ஆனால் இதயங்கள் இணைந்தே இருக்கட்டும்' என்கிறது குரான்.  கடமையைச் செய் பலனை எதிர்பாராதே' என்கிறது பகவத் கீதை.  என் சமூகம் உனக்கு முன்பாக செல்லும்' என்கிறது பைபிள். மக்களுக்கு நன்மை செய்ய வேண்டும் என்பதே எனது எண்ணம். மனிதநேயமும், அன்பும் மனிதனுக்கு வேண்டும். மக்களை நேசிக்க வேண்டும்.

காங்கிரஸ் வரக்கூடாது என்பதற்காக 1967 ல் அண்ணா போராடினார். ஆனால் இன்று காங்கிரசை கூட்டணிக்கு அழைத்திருப்பது என்ன அர்த்தம்?

விலைவாசி உயர்வு பிரச்சினையை சொன்னால், 1 ரூபாய் அரிசி கொடுக்கிறோம் என்கிறார்கள். குழம்பு வைக்க வேண்டும் என்றால், பருப்பின் விலை என்ன? 5 ஆண்டாக தி.மு.க.வை விமர்சித்த பா.ம.க. ஐந்தே நிமிடத்தில் தி.மு.க.வுடன் ஒட்டிக் கொண்டது. ஆனால் மக்கள் அவர்களுக்கு போடுவார்கள் சீரோ மார்க்.

விஜயகாந்த் பணம் வாங்கிவிட்டான் என்கிறார்கள். நான் எம்.ஜிஆர். ஆரம்பித்த கட்சியில் இன்று சேர்ந்து இருக்கிறேன். மக்களே நீங்கள் சொன்னதால்தான் நான் கூட்டணி வைத்தேன். அ.தி.மு.க. கூட்டணியை அமோக வெற்றி பெறச் செய்ய வேண்டும். எம்.ஜி.ஆர். சொன்னது மாதிரி தூங்காதே தம்பி தூங்காதே. விழித்திருக்க வேண்டும் என்றார்.