கூடங்குளம் அணுமின்நிலையத்தில் விபத்து நடந்ததாக வதந்தி

கூடங்குளம் அணுமின்நிலையத்தில் மின் உற்பத்தி தொடங்குவதற்கான பணிகள் மும்முரமாக நடைபெற்று வருகின்றன. அதனை மூட வலியுறுத்தி போராட்டக் குழுவினர் இடிந்தகரையில் 4-ம் கட்டமாக காலவரையற்ற உண்ணாவிரதம் இருந்து வருகின்றனர். இந்தநிலையில் கூடங்குளம் அணுமின்நிலையத்தில் விபத்து நடந்ததாக பரவிய வதந்தியால் பரபரப்பு ஏற்பட்டது. 

கூடங்குளத்தில் உள்ள ஒரு லேத் பட்டறையில் கியாஸ் சிலிண்டர் கசிவு ஏற்பட்டதன் காரணமாக இசக்கிராஜன் (19), சிவகுமார் (29) ஆகியோர் காயமடைந்தனர். அவர்கள் அஞ்சுகிராமத்தில் உள்ள தனியார் ஆஸ்பத்திரியில் அனுமதிக்கப்பட்டனர். இந்த சம்பவம் அணுஉலையில் விபத்து நடந்ததாக வதந்தி பரவியது. இதனால் அப்பகுதி மக்களிடையே பீதி ஏற்பட்டது. 

ஆனால் அணுமின்நிலையத்தில் இதுபோன்ற சம்பவம் எதுவும் நடைபெறவில்லை என்று அதிகாரிகள் தெரிவித்தனர். இதுகுறித்து போலீசார் உடனடியாக விசாரணை மேற்கொண்டனர். அப்போது கியாஸ் சிலிண்டர் கசிவு விபத்து அங்குள்ள லேத் பட்டறையில் ஏற்பட்டது என்று தெரியவந்தது. இதையடுத்து அப்பகுதி மக்களிடம் நிலவிய அச்சம் விலகியது.