சகானாவின் பூர்வீகம் கேரள மாநிலம். அங்கு பத்தினம்திட்டா பகுதியில் வசித்து வந்த அவர் கடந்த 11 ஆண்டுகளுக்கு முன்னர் கேரளாவை சேர்ந்த சித்திக் என்பவரை முதலில் திருமணம் செய்துள்ளார். இவர் மூலமாக பெண் குழந்தை ஒன்றும் சகானாவுக்கு பிறந்துள்ளது. திருமண வாழ்க்கையில் அதிக நாட்டம் இல்லாமல் இருந்த சகானா சில ஆண்டுகளிலேயே கணவரையும், குழந்தையையும் உதறி தள்ளினார். பின்னர் கடந்த 2005-ம் ஆண்டில் திருச்சூரை சேர்ந்த ஊனமுற்ற வாலிபர் பிஜுயுடன் சகானாவுக்கு பழக்கம் ஏற்பட்டது.
அவரது உடல் ஊனத்தை பயன்படுத்தி பாசமுடன் பழகுவதுபோல பாவ்லா காட்டிய சகானா, மெல்ல... மெல்ல... தனது வேலையை காட்டத் தொடங்கினார். ரூ.1 லட்சம் பணம், 13 பவுன் நகை ஆகியவற்றை பிஜுவிடம் இருந்து பறித்துக் கொண்ட சகானா, கொஞ்சம் கொஞ்சமாக அவரிடமிருந்தும் விலகிச் சென்றார். இதன்பிறகு கேரளாவை சேர்ந்த இன்னொரு வாலிபர் ஒருவரையும் தனது காதல் வலையில் வீழ்த்திய சகானா பின்னர் அவரை விட்டு விலகினார். இதன்பிறகு கடந்த 2006-ம் ஆண்டில் சென்னையில் வந்து குடியேறிய சகானா, தனது “காதல் வேட்டை”யை இங்கும் தொடர்ந்தார்.
வேப்பேரியில் “சூப்பர் மார்க்கெட்” ஒன்றில் பணியில் சேர்ந்த அவருக்கு கடையின் உரிமையாளர் சம்சுதீனுடன் பழக்கம் ஏற்பட்டது. இங்கு வைத்துதான் பிரசன்னாவை சகானா சந்தித்தார். “எனக்கு யாருமே இல்லை, நான் ஒரு அனாதை” என்று முதலில் சாதாரணமாக தொடங்கிய இவர்களது நட்பு பின்னர் காதலாகி... கல்யாணத்தில் முடிந்தது.
கடந்த மார்ச் மாதம் சகானாவை இவர் திருமணம் செய்து கொண்டார். சில காலம் ஒன்றாக குடும்பம் நடத்திய சகானா, நான் ஐ.ஏ.எஸ். தேர்வுக்கு தயாராக வேண்டியுள்ளதால் எனக்கு தனிமை தேவைப்படுகிறது. விடுதியில் தங்கி படிக்கட்டுமா? என சகானா அப்பாவி போல கேட்டுள்ளார். இதை நம்பி, பிரசன்னாவும் அவரை விடுதியில் சேர்த்து விட்டார். இதன்பிறகு சகானா பற்றி திருவொற்றியூர் சரவணன், அடையாரை சேர்ந்த இன்னொரு சரவணன் ஆகியோர், கடந்த 21-ந்தேதி பிற்பகலில் கமிஷனர் அலுவலகத்திற்கு வந்து புகார் செய்தனர். அதில், திருமணம் செய்து கொள்வதாக கூறி சகானா ஏமாற்றி விட்டார். நகை- பணத்தையும் நாங்கள் இழந்து விட்டோம் என்று கூறியிருந்தனர்.
இதனை பத்திரிகையில் பார்த்து பிரசன்னா அதிர்ச்சி அடைந்தார். இதைத் தொடர்ந்து அவரும், சகானாவால் திருமணம் செய்து ஏமாற்றப்பட்ட என்ஜினீயர் மணிகண்டனும் நேற்று முன்தினம் மாலையில் புகார் செய்தனர். இவர்களை போல சகானா விடம் ராஜேஷ், சீனிவாசன், ராகுல், சந்திரபாபு என பலர் ஏமாந்துள்ளனர். இப்படி 15 பேர் சகானா விரித்த வலையில் சிக்கியிருக்கலாம் என்று தெரிகிறது.
கமிஷனர் அலுவலகத்தில் கொடுக்கப்பட்ட புகார் மனுக்கள் அடையாறு உதவி கமிஷனர் மோகன் ராஜுக்கு அனுப்பி வைக்கப்பட்டுள்ளது. சகானாவிடம் ஏமாந்த 2 சரவணன்களின் புகார் மனுக்கள் பற்றியும் அடையாறு போலீசார் விசாரணை நடத்தி வருகிறார்கள். அடையாறு பொன்னியம்மன் நகரில் வசித்து வரும் சரவணனிடம் “நோட்டரி பப்ளிக்” ஆவதற்காக தேர்வு எழுத வேண்டியுள்ளது. என்று ரூ.25 ஆயிரம் பணம் வாங்கியுள்ளார். சகானா வுக்கு தங்க செயின் ஒன்றை யும், சரவணன் பரிசாக வழங்கியுள்ளார்.
இந்நிலையில் சினிமா உதவி இயக்குனர் ஒருவரும், சகானா விரித்த வலையில் விழுந்துள்ளார். பின்னர் இருவரும் வடபழனியில் நட்சத்திர ஓட்டலில் வைத்து திருமணம் செய்து கொண்டுள்ளனர். இதில் சினிமா நட்சத்திரங்கள் பலரும் பங்கேற்றுள்ளனர். இப்படி கண்ணில் தென்பட்ட வாலிபர்களை எல்லாம் வளைத்து போட்ட சகானா தற்போது எங்கு இருக்கிறார் என்று தெரியவில்லை. அவரது 2 செல்போன்களும் சுவிட்ச் ஆப் செய்யப்பட்டுள்ளன.
ஆனால் நேற்று மாலை வரை சகானா, தனது செல் போனில் காதல் கணவர்களுடன் பேசி கொலை மிரட்டல் விடுத்துள்ளார். இதுபற்றி சகானாவின் கணவர்களில் ஒருவரான பிரசன்னா தனியாக புகார் ஒன்றையும் அளித்துள்ளார். இதுபற்றியும் விசாரணை நடத்தப்பட்டு வருகிறது.
சகானாவை பிடிக்க போலீசார் வேகம் காட்டி வருகிறார்கள். அவர் சிக்கினால் மேலும் பல திடுக்கிடும் தகவல்கள் வெளியாகும் என்று எதிர்பார்க்கப்படுகிறது.
No comments:
Post a Comment