புதுக்கோட்டை தேர்தல் பொது வேட்பாளராக போட்டியிட டி.ராஜேந்தர் முடிவு

புதுக்கோட்டை சட்டமன்ற தேர்தலில் தி.மு.க. உள்ளிட்ட சில கட்சிகள் போட்டியிடுவது இல்லை என முடிவு செய்துள்ளது. இந்த நிலையில் புதுக்கோட்டை தொகுதியில் பொது வேட்பாளராக போட்டியிட லட்சிய தி.மு.க. தலைவரும் திரைப்பட இயக்குனருமான டி.ராஜேந்தர் முடிவு செய்துள்ளார். 

ஏற்கனவே சட்டமன்ற தொகுதியில் டி.ராஜேந்தர் போட்டியிட்டபோது தி.மு.க. ஆதரவு அளித்தது. அதுபோல் புதுக்கோட்டையிலும் தி.மு.க. மற்றும் பிற கட்சிகளிடம் ஆதரவு கேட்க திட்டமிட்டு உள்ளதாகவும் தகவல் வெளியாகியுள்ளது. தேர்தலில் போட்டியிடுவது குறித்து முடிவு எடுக்க நிர்வாகிகள் கூட்டத்தை அவர் கூட்டியுள்ளார். 

இதுகுறித்து டி.ராஜேந்தர் வெளியிட்டுள்ள அறிக்கையில் கூறி இருப்பதாவது:- 
வரும் ஜூன் மாதம் புதுக்கோட்டை சட்டமன்ற தொகுதிக்கு இடைத்தேர்தல் நடக்கவிருப்பது தெரிந்ததே அந்த இடைத்தேர்தலில் நிலவும் அசாதாரண நிலையை மனதில் கொண்டு பல பிரதான கட்சிகளே தேர்தலில் நிற்பதில்லை என முடிவெடுத்து அவர்கள் தேர்தலை புறக்கணிக்க போவதாக அறிவித்துள்ளனர். 

இப்படிப்பட்ட ஓர் சூழ்நிலையில் இந்த புதுக்கோட்டை இடைத்தேர்தலில் லட்சிய தி.மு.க. பங்கு வகிக்கலாமா என முக்கிய ஆலோசனை கூட்டம் நடத்த வரும் மே மாதம் 14-ந்தேதி சென்னை லட்சிய தி.மு.க. தலைமை கழகத்தில் காலை 11 மணி அளவில் தலைமை செயற்குழு கூட்டம் நடைபெறவிருக்கிறது. 

புதுக்கோட்டை இடைத்தேர்தலில் போட்டியிடுவது குறித்தும், வருங்காலத்தில் லட்சிய தி.மு.க.வின் வளர்ச்சிக்கான பொதுக்கூட்டங்கள், கொடியேற்று விழா என சுற்றுப்பயண நிகழ்ச்சிகள் குறித்தும் கலந்தாலோசனை நடத்தப்படவிருக்கின்றது. 

இவ்வாறு அறிக்கையில் கூறியுள்ளார்.