புதுக்கோட்டை இடைத்தேர்தலில் தே.மு.தி.க. போட்டியிடுமா?: விஜயகாந்த் பதில்

திருச்சி மாவட்டத்தில் தே.மு.தி.க. எம்.எல்.ஏ. செந்தில்குமார் வெற்றி பெற்று தேர்ந்தெடுக்கப்பட்ட திருவெறும்பூர் தொகுதிக்குட்பட்ட அரசங்குடி, கூத்தைப்பார், திருவெறும்பூர், துவாக்குடி, பூலாங்குடி உள்ளிட்ட இடங்களில் தே.மு.தி.க. தலைவர் விஜயகாந்த் எம்.எல்.ஏ. நேற்று நேரில் சென்று ஆய்வு செய்தார்.

திருவெறும்பூரில் உள்ள அரசங்குடி அரசு மேல்நிலைப்பள்ளிக்கு சென்று அங்கு மாணவ, மாணவிகளுடன் கலந்துரையாடினார். அதன்பிறகு கூத்தைப்பாரில் உள்ள ஒரு பள்ளிக்கு சென்று இலவச நோட்டு, பேனாக்களை வழங்கினார்.

பின்னர் திருவெறும்பூரில் நடந்த நலத்திட்ட உதவிகள் வழங்கும் விழாவில் கலந்து கொண்டு பெண்களுக்கு இலவச தையல்மிஷின், மாற்றுத்திறனாளிகளுக்கு மூன்று சக்கர சைக்கிள் உள்ளிட்டவைகளை வழங்கினார்.

பின்னர் விஜயகாந்த் நிருபர்களுக்கு பேட்டி அளித்தார். அப்போது நிருபர்கள் கேட்ட கேள்வியும், அதற்கு அவர் அளித்த பதில்களும் வருமாறு:-

கேள்வி:- சட்டசபையில் எதிர்க்கட்சியாக இருந்து கொண்டு மக்கள் பிரச்சினைகளை பற்றி பேசாமல், தினமும் தே.மு.தி.க. எம்.எல்.ஏக்கள் வெளிநடப்பு செய்கிறீர்களே?

பதில்:- ஆளுங்கட்சியினர் தானே எங்களை வெளிநடப்பு செய்ய வைக்கிறார்கள். அ.தி.மு.க. இதுவரை என்ன? மக்கள் பிரச்சினையை சட்டசபையில் பேசி இருக்கிறார்கள். திருச்செங்கோட்டில் ரேசன் கடையில் நடந்த ஊழலை கண்டுபிடித்தேன். இதுவரை என்ன நடவடிக்கை எடுத்தார்கள். எங்கள் கேள்விகளுக்கே பதில் சொல்ல முடியாமல் இருப்பதால்தான் வெளி நடப்பு செய்கிறோம்.

கேள்வி:- ஆரம்பத்தில் தேர்தலில் நிற்கும்போது தெய்வத்தோடும், மக்களோடும் தான் கூட்டணி என்றீர்கள். அதன்பிறகு கடந்த சட்டசபை தேர்தலில் கூட்டணி வைத்து போட்டியிட்டீர்களே?

பதில்:- சட்டசபை தேர்தலில் மக்களுக்காகத்தான் கூட்டணி வைத்தேன்.

கேள்வி:- கருணாநிதி ஆரம்பித்துள்ள டெசோ அமைப்பு பற்றிய உங்கள் கருத்து?

பதில்:- இதற்கு முன்பு ஆரம்பிக்கப்பட்ட டெசோ ஏன்? கலைக்கப்பட்டது என்பது உங்களுக்கு தெரியுமா?. எல்லாத்தையும் பொறுத்து இருந்து பாருங்கள். உங்களுக்கே தெரியும்.

கேள்வி:- இலங்கைக்கு சென்ற எம்.பிக்கள் குழுவால் ஈழத்தமிழர்களுக்கு ஏதும் நன்மை கிடைத்ததா?

பதில்:- இலங்கைக்கு எம்.பிக்கள் குழு சென்றது வெறும் கண் துடைப்பு. இலங்கையில் இன்னும் கண்ணிவெடிகள் எடுக்கவில்லை. அதனை எடுத்த பிறகு தான் தமிழர்களை அங்கு குடியமர்த்த முடியும் என்று இலங்கை அரசு சொல்கிறது. அது பொய். தமிழர்களை கொன்று உடல்களை புதைத்த இடத்தில் தோண்டினால், கொத்து குண்டு வீசியது தெரிந்துவிடும் என்பதற்காக தான் கண்ணி வெடி இருப்பதாக கதை கட்டுகிறார்கள்.

கேள்வி:- புதுக்கோட்டை இடைத்தேர்தலில் தே.மு.தி.க. போட்டியிடுகிறதா?.

பதில்:- ஏன்? அவசரப்படுகிறீர்கள். இடைத்தேர்தலில் போட்டியிடுவது பற்றி பின்னர் அறிவிப்போம். பொறுத்து இருந்து பாருங்கள்.

இவ்வாறு அவர் கூறினார்.